बोरामा हालेर खोलामा फ्यालिएकी झापाको दमककी २१ वर्षीया रमा तिवारी रोमाको हत्या प्रकरणले यतिबेला जिल्ला मात्र होइन, देशभरि नै व्यापक चासो र चिन्ता पैदा गरेको छ।

घटनाको अनुसन्धान तीव्र रूपमा अघि बढिरहेका बेला सामाजिक सञ्जाल, युट्युब तथा विभिन्न डिजिटल प्लेटफर्ममार्फत अपुष्ट र भ्रामक सूचना फैलिन थालेपछि जिल्ला प्रहरी कार्यालय झापाले विशेष विज्ञप्ति जारी गर्दै सर्वसाधारण तथा कन्टेन्ट क्रिएटरहरूलाई जिम्मेवार बन्न आग्रह गरेको छ।

प्रहरीका अनुसार अनुसन्धानको क्रममा रहेका संवेदनशील विषयवस्तु, अनुमानका भरमा गरिएका दाबी तथा आधिकारिक पुष्टि नभएका विवरणहरू सार्वजनिक हुँदा अनुसन्धान प्रक्रियामै गम्भीर असर पर्ने जोखिम हुन्छ। यस्ता गतिविधिले वास्तविक अपराधी पहिचान गर्न कठिनाइ सिर्जना गर्नुका साथै न्याय सम्पादन प्रक्रियालाई समेत प्रभावित पार्न सक्ने प्रहरीको भनाइ छ।

जिल्ला प्रहरी कार्यालय झापाले जारी गरेको विज्ञप्तिमा अनुसन्धानसँग सम्बन्धित सूचना केवल आधिकारिक निकायबाट प्राप्त जानकारीका आधारमा मात्र सम्प्रेषण गर्न अनुरोध गरिएको छ। प्रहरीका अनुसार केही युट्युब च्यानल र सामाजिक सञ्जाल प्रयोगकर्ताले विभिन्न व्यक्तिसँगको अन्तर्वार्ता तथा अनुमानमा आधारित सामग्री सार्वजनिक गरिरहेका छन्, जसले अनुसन्धानलाई प्रभावित पार्ने सम्भावना बढाएको छ।

दमक–८ बसन्तटोल निवासी रमा तिवारी जेठ १३ गते राति घरबाट बाहिर निस्किएकी थिइन्। परिवारका अनुसार उनी आफ्ना नजिकका एक केटा साथीलाई भेट्न जाने भन्दै घरबाट निस्किएकी थिइन्। त्यसपछि उनी घर फर्किनन्।

मृतककी आमा मुना तिवारीका अनुसार जेठ १३ गते साँझ रमा घरमै थिइन्। सोही समयमा उनका घनिष्ठ केटा साथीले मोबाइल फोनमार्फत सम्पर्क गरी भेट्न बोलाएका थिए। आमाबुवाको अनुमति लिएर घरबाट निस्किएकी रमा त्यसपछि सम्पर्कविहीन बनेकी थिइन्।

परिवारका सदस्यहरूका अनुसार रमा र ती युवकबीच लामो समयदेखि प्रेम सम्बन्ध रहेको थियो। उनीहरूको सम्बन्धबारे परिवार पनि जानकार थियो। केही समययता भने उनीहरूबीच नियमित भेटघाट र संवाद कम भएको बताइएको छ।

परिवारका अनुसार ती युवक केही समयदेखि लागुऔषध दुर्व्यसनको समस्यामा परेका थिए र उनलाई सुधार केन्द्रमा राखिएको थियो। जेठ १३ गते नै उनले सुधार केन्द्रमा तोकिएको कोर्स पूरा गरी बाहिर निस्किएपछि रमासँग सम्पर्क गरेका थिए।

रमा हराएको तीन दिनपछि, जेठ १६ गते बिहान दमक–१० स्थित सेतुमारी पुलमुनि रहेको रतुवा खोलामा बोराभित्र शव देखिएको भन्दै स्थानीयवासीले प्रहरीलाई खबर गरेका थिए।

सूचना प्राप्त हुनासाथ इलाका प्रहरी कार्यालय दमक तथा जिल्ला प्रहरी कार्यालय झापाको टोली घटनास्थल पुगेको थियो। प्रारम्भिक अनुसन्धानका क्रममा बोराभित्र रहेको शव रमा तिवारीकै भएको पुष्टि भएको थियो।

शवको सनाखत मृतकका बुवा नारायण तिवारी र आमा मुना तिवारीले गरेका थिए। शव पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको थियो। पोस्टमार्टमपछि परिवारले शव बुझेर सोमबार दमक–१ मा इसाई परम्पराअनुसार अन्त्येष्टि गरेका छन्।

इलाका प्रहरी कार्यालय दमकका प्रमुख डीएसपी हरि बस्नेतका अनुसार घटनाको अत्यन्त सूक्ष्म ढंगले अनुसन्धान भइरहेको छ। अनुसन्धान टोलीले मृतकको मोबाइल फोनको कल डिटेल, लोकेसन हिस्ट्री, सामाजिक सम्बन्ध, भेटघाट तथा घटनाअघि र पछिका गतिविधिको विश्लेषण गरिरहेको छ।

प्रहरीले शंकास्पद व्यक्तिहरूसँग सोधपुछ गरिरहेको र घटनासँग सम्बन्धित महत्वपूर्ण प्रमाणहरू संकलन गरिरहेको जनाएको छ। अनुसन्धानमा संलग्न अधिकारीहरूका अनुसार घटनाको वास्तविकता पत्ता लगाउने दिशामा महत्वपूर्ण प्रगति भएको छ र अनुसन्धान निष्कर्षउन्मुख अवस्थामा पुगेको छ।

यद्यपि, प्रहरीले अनुसन्धान प्रभावित हुने भएकाले हालसम्म पक्राउ, संलग्न व्यक्तिको नाम वा अन्य संवेदनशील विवरण सार्वजनिक नगर्ने नीति अपनाएको जनाएको छ।

रमाको मृत्युले उनका परिवारजन गहिरो शोकमा डुबेका छन्। छोरी घरबाट सामान्य रूपमा बाहिर निस्किएर केही दिनपछि बोराभित्र मृत अवस्थामा भेटिनु परिवारका लागि असह्य पीडा बनेको छ।

आमा मुना तिवारीले दोषी जोसुकै भए पनि कानुनी दायरामा ल्याउनुपर्ने माग गर्दै घटनाको निष्पक्ष अनुसन्धानको अपेक्षा व्यक्त गरेकी छन्। परिवारले प्रहरीमाथि विश्वास रहेको बताउँदै सत्यतथ्य सार्वजनिक हुने आशा व्यक्त गरेको छ।

रमाको हत्या प्रकरणले दमक क्षेत्रका स्थानीयवासीलाई समेत स्तब्ध बनाएको छ। सामान्य परिवारकी युवतीको यसरी रहस्यमय मृत्यु भएपछि स्थानीय समुदायमा त्रास र चासो दुवै बढेको छ।

स्थानीयवासीहरूले घटनाको यथाशीघ्र सत्यतथ्य सार्वजनिक गर्न तथा दोषीलाई कडा कारबाही गर्न माग गरेका छन्। सामाजिक सञ्जालमा समेत घटनाबारे व्यापक चर्चा भइरहेका छन्। तर प्रहरी भने तथ्य पुष्टि नभएसम्म कुनै निष्कर्षमा नपुग्न आग्रह गरिरहेको छ।

रमा तिवारीको रहस्यमय मृत्यु अहिले झापाको सबैभन्दा चर्चित आपराधिक घटनामध्ये एक बनेको छ। घटनाको वास्तविक कारण के थियो, उनको मृत्यु कसरी भयो र त्यसमा को–को संलग्न थिए भन्ने प्रश्नको उत्तर खोज्न प्रहरी अनुसन्धान जारी छ।

प्रहरीले अपराधी जोसुकै भए पनि कानुनी कारबाहीको दायरामा ल्याइने प्रतिबद्धता व्यक्त गरेको छ। उता परिवार, स्थानीयवासी र आमजनता भने घटनाको सत्य बाहिर आउने दिनको प्रतीक्षामा छन्।

अनुसन्धानको अन्तिम निष्कर्ष सार्वजनिक भएपछि मात्रै रमा तिवारीको मृत्युको वास्तविक रहस्य खुल्ने अपेक्षा गरिएको छ।