भारतको टिकट काटेका व्यक्तिलाई दुबई उडाएको आरोपमा नेपाल वायुसेवा निगम (नेपाल एयरलाइन्स)का दुई कर्मचारी पक्राउ परेका छन्।

काठमाडौं उपत्यका अपराध अनुसन्धान कार्यालयको टोलीले करारका ग्राउण्ड ह्याण्डलिङ स्टाफ सुमीत्रा चन्द र प्रवीण लामिछानेलाई पक्राउ गरेको हो।

अपराध अनुसन्धान कार्यालयका एसएसपी सन्तोष खड्काका अनुसार भारतको इन्डिगो एयरको उडान भएका एक भारतीय यात्रु भारत जान अध्यागमन जाँचपास भएर वेटिङ रुममा पुगेका थिए।

उनलाई निगमका कर्मचारी चन्दले फ्लाई दुबईबाट दुबई जाने बोर्डिङ पास दिएको भेटिएको छ। ती भारतीय नागरिक जेठ ३ गते दुबई उडेका थिए। 

नेपालबाट तेस्रो मुलुक जानुपरे भारतीय नागरिकले नो अब्जेक्शन सर्टिफिकेट (एनओसी) पेस गर्नुपर्ने भए पनि भारत जाने टिकट काटेका व्यक्तिलाई दुबई उडाएको भन्दै उनीहरू अनुसन्धानमा तानिएका हुन्।

उनीहरूलाई पक्राउ गर्न अध्यागमन विभागले पत्राचार गरेको प्रहरीले जानकारी गरेको छ।