सङ्खुवासभा जिल्ला कारागार खाँदबारीमा दुईजना कैदी हत्या प्रकरणका ७ प्रहरीसहित १५ जनालाई जन्मकैदको सजाय सुनाइएको छ।

जिल्ला कारागारमा २०८० साउन २४ गते सुरक्षाकर्मी र केही कैदीबन्दीको कुटपिटबाट २ जना कैदीको मृत्यु भएको घटनामा जिल्ला अदालत संखुवासभाले १५ जनालाई जन्मकैदको फैसला सुनाएको हो।

कारागारको शौचालयको झ्यालको रड काटेर भाग्न खोजेको भन्दै नियन्त्रणमा लिएर सुरुमा प्रहरीले र त्यसपछि अन्य कैदीबन्दीले सामूहिक कुटपिट गर्दा जिल्लाको मादी नगरपालिका–५ का २० वर्षीय विनोद तोलाङ्गी र नुवाकोटको ककनी गाउँपालिका–७ का २८ वर्षीय आकाश बलामीको मृत्यु भएको अनुसन्धानबाट खुलेको थियो।

सोही मुद्धामा न्यायाधीश राजकुमार कोइरालाको इजलासले मलुकी अपराध संहिता २०७४ को दफा १७१ (१) बमोजिम कसुरमा प्रहरीसहित १५ जनाई जन्मकैदको फैसला भएको जिल्ला अदालतका श्रेस्तेदार उज्वल न्यौपानेले बताए।

त्यसैगरी प्रतिवादीबाट जनही ५० हजार मृतक तोलाङ्गी र बलामीका नजिकका हकदारलाई क्षतिपूर्ति भराउन आदेश भएको श्रेस्तेदार न्यौपानेले बताए।

कैदीको कुटपिटपछि हत्या घटनाका आरोपित सात जना प्रहरीलाई धनकुटा र आठ जना कैदीलाई तेह्रथुम कारागार चलान गरेको थियो। 

कैदी हत्या घटनामा प्रहरी सहायक निरीक्षक लक्ष्मी चौधरी, प्रहरी जवान सुमन गुरुङ, कारागार सुरक्षा गार्ड दमनसिंह राई, हवल्दार राजकुमार श्रेष्ठ, जवान पवनकुमार महतो, सुरक्षा गार्ड नुसन राईलाई जन्मकैद फैसला भएको छ।

त्यसैगरी चौकीदार राम कार्की, बडानाइके अनिष शर्मा कट्टेल, सचिन राई, सहनाइके सुमन सारुमगर, टीकाराम चौहान, नवीनकुमार राई तथा कैदीहरू मीनबहादुर तामाङ र इन्द्रध्वज घिमिरे समेत जन्मकैद सजायको फैसला भएको छ।

कैदीको कुटपिटपछि हत्या अभियोगमा पक्राउ परेका जिल्ला कारागारका इञ्चार्ज असईसहित सात जना प्रहरी र आठ जना कैदीबन्दीलाई जिल्ला अदालतका तत्कालीन न्यायाधीश टेकनाथ गौतमको इजलासले थुनामा पठाउन आदेश भएको थियो।