काठमाडौंको त्रिपुरेश्वरस्थित राहदानी विभाग अगाडि बिहीबार दिउँसो आफ्नै शरीरमा आगो लगाएर आत्मदाहको प्रयास गर्ने व्यक्तिको पहिचान खुलेको छ।

आत्मदाह प्रयास गर्ने युवक मुगुको सोरु गाउँपालिका–१ घर भई हाल भक्तपुर बस्ने २५ वर्षीय गणेश नेपाली रहेको खुलेको हो। 

जिल्ला प्रहरी परिसर काठमाडौंका अनुसार पीडित युवक पठाओ (राइड सेयरिङ)चालक रहेको खुलेको छ।

राहदानी विभागबाहिर पार्किङ गरेर राखेको मोटरसाइकलमा काठमाडौं महानगर प्रहरीले ‘ह्वील लक’ लगाएको भेटिएको प्रहरीले जनाएको छ। प्रत्यक्षदर्शीका अनुसार ह्वील लक गरिएपछि आवेगमा आएका युवकले आफ्नै मोटरसाइकलबाट पेट्रोल झिकेर शरीरमा खन्याएर आत्मदाहको प्रयास गरेका हुन्।

जिल्ला प्रहरी परिसरले भने ह्वील लक गरिएको भेटिएपनि घटनाको कारण त्यही नै हो वा होइन भन्ने पुष्टि भइनसकेको जनाएको छ।

शरीरको अधिकांश भाग जलेका नेपालीको वीर अस्पतालमा गम्भीर अवस्थामा उपचार भइरहेको छ। अस्पतालका अनुसार उनको शरीर ६५ प्रतिशत जलेको छ।