काठमाडौंका सार्वजनिक स्थानहरूमा मधेसी समुदायलाई लक्षित गरी होच्याउने शब्दहरू लेख्ने व्यक्ति पक्राउ परेका छन्।

पक्राउ पर्नेमा खोटाङ जिल्लाको बाक्सिला नगरपालिका-१५ घर भई हाल काठमाडौं महानगरपालिका-३१ शङ्खमुल बस्ने ३५ वर्षीय विशाल गुरुङ छन्।

प्रहरीका अनुसार गुरुङले लामो समयदेखि काठमाडौंका सार्वजनिक स्थलहरूमा मधेशी समुदायलाई होच्याउने र घृणा फैलाउने प्रकृतिका शब्दहरू लेख्दै सामाजिक सद्भावमा खलल पुर्‍याउने र उक्साउने गतिविधि गर्दै आएका थिए।

जिल्ला प्रहरी परिसर काठमाडौं र प्रहरी वृत्त नयाँ बानेश्वरबाट खटिएको संयुक्त प्रहरी टोलीले उनलाई आइतबार शङ्खमुल क्षेत्रबाट नियन्त्रणमा लिएको हो।

उनलाई सार्वजनिक शान्ति खलल पार्न नहुने सम्बन्धी कसुरमा पक्राउ गरी प्रहरी वृत्त बानेश्वरबाट अनुसन्धान भइरहेको जिल्ला प्रहरी परिसर काठमाडौंले जनाएको छ।