कोरोना भाइरसको दोस्रो लहर रोकथाम तथा सङ्क्रमणबाट बच्न जुम्लाका सात स्थानीय तह आइसोलेशन सेन्टर निर्माणमा जुटेका छन्। 

यहाँको तिला गाउँपालिकाले पाँच शय्याको अक्सिजनसहितको आइसोलेशन सेन्टर निर्माण गरेको छ। सो गाउँपालिको – ३ मा रहेको कोभिड अस्थायी अस्पतालमा आइसोलेशन सेन्टर निर्माण गरेको गाउँपालिका स्वास्थ्य शाखाका प्रमुख गशेष शाहीले बताए। 

उनले गाउँपालिकाको तीन स्थानमा हेल्थ डेस्क स्थापना गरेको बताए। सेन्टरमा थप आवश्यक पर्ने सामग्री तत्काल उपलब्ध गराउन नेपालगञ्जबाट औषधिको माग गरिएको छ। आवश्यक सामग्री तत्काल व्यवस्थापनका लागि निर्देशन दिइएको छ।

कोरोना भाइरस बढ्दै गएमा र शय्याको अभाव भएमा सेन्टरमा थप शय्याको व्यवस्था समेत गर्न गाउँपालिका लागि परेको स्वास्थ्य शाखाका प्रमख शाहीले बताए। कोभिड अस्थायी अस्पतालमा एक मेडिकल अधिकृत, एक नर्स र एक कार्यालय सहयोगी कार्यरत छन्। 

चिकित्सक अभाव

स्थानीय तहले सञ्चालन गरेका अस्थायी कोभिड अस्पतालका लागि चिकित्सकको अभाव भएपछि अक्सिजनसहितको आइसोलेशन सञ्चालन गर्न समस्या भएको छ।

सङ्घीय सरकारले अस्पताल तथा प्राथमिक स्वास्थ्य केन्द्र नभएका स्थानीय तहमा अस्थायी कोभिड अस्पताल निर्माण गर्न सबै स्थानीय तहमा बजेटसहित निर्देशन गरेको छ। 

तत्काल तीन महिनाका लागि बजेट व्यवस्थापनसहित यहाँका स्थानीय तहमा सङ्घीय सरकारले रु १० लाखका दरले बजेट पनि पठाएको छ।

जिल्लाका सात स्थानीय तहमा अस्थायी कोभिड अस्पताल स्थापना गर्न बजेट पठाइए पनि तिला बाहेक अरु ६ स्थानीय तहले एक  चिकित्सक पनि पदपूर्ति गर्न नसकेको यहाँका गाउँपालिका प्रमुख बताउँछन्। 

सरकारले कोभिड अस्पतालका लागि एक मेडिकल अधिकृत, दुई स्टाफ नर्स तथा एकएक  ल्याब टेक्निसियन र कार्यालय सहयोगी राख्न बजेटसहितको व्यवस्थापन गरेको थियो। 

यहाँका स्थानीय तहले १५ दिनको समयावधिमा दुई पटकसम्म विज्ञापन आह्वान गरेकामा एक चिकित्सकले पनि विज्ञापनमा दरखास्त नदिएको सिञ्जा गाउँपालिकाका स्वास्थ्य संयोजक नरबहादुर बुढाले बताए। 

चन्दननाथ नगरपालिकाभित्र कर्णाली स्वास्थ्य विज्ञान प्रतिष्ठान भएकाले सो नगरपालिकामा मेडिकल अधिकृत छन्। स्टाफ नर्स र अन्य कर्मचारीका हकमा ठूलो सङ्ख्यामा आवेदन परी परीक्षा लिई उत्तिर्ण हुनेलाई भर्ना गरेपनि मेडिकल अधिकृत अहिलेसम्म पाउन नसकिएको यहाँका स्थानीय तहका स्वास्थ्य शाखाले जनाएका छन्। 

रु चार लाख ५० हजार तलब र रु पाँच लाख ५० हजार अस्थायी कोभिड अस्पताल व्यवस्थापनका लागि बजेट पठाइएको थियो। अहिले जटिल प्रकृतिका सङक्रमित सम्पर्कमा आउँदा कर्णाली स्वास्थ्य विज्ञान प्रतिष्ठान जुम्लामा पठाउनुपर्ने बाध्यता रहेको कोभिड अस्थायी अस्पतालले जनाएका छन्। 

पत्रकार महासंघको भवनमा आइसोलेशन

नेपाल पत्रकार महासंघ जुम्लाले पाँच शय्याको आइसोलेशन तयार गरेको छ। जुम्ला सदरमुकाम खलंगा स्थित महासंघले आफ्नै भवनमा पाँच शय्याको आइसोलेशन तयार गरेको हो। 

दोस्रो लहरको कोरोना सङ्क्रमण दैनिक बढ्दै गएको र पत्रकारलाई पनि सङ्क्रमण हुन सक्ने भन्दै तत्काल पाँच शय्याको आइसोलेशन को पूर्वतयारी गरेको महासंघ जुम्लाका अध्यक्ष नेत्र बहादुर शाहीले बताए। 

छुटै आइसोलेशन ले पत्रकारलाई राहत मिल्ने महासंघका सचिव मानदत्त रावलले बताए। महासंघको अनुरोधमा आइसोलेशन निर्माणका लागि विभिन्न संस्थाले करिब ५० हजार बराबरको नौ प्रकारका सामाग्री उपलब्ध गराएको सचिव रावलले बताए। रासस