नागरिकता विधेयक पास गर्ने दिन अचानक झापा पुगे ओली

प्रतिनिधिसभा बैठक बिहीबार बिहान ११ बजे बोलाइएको छ। तर, डेढ घन्टा ढिला भइसक्दा पनि बस्न सकेको छैन।

आजको प्रतिनिधिसभा बैठकमा उपस्थित हुन नसक्ने सांसदहरूको नाम प्रस्तुत हुने कार्यसूची छ।

त्यससँगै राष्ट्रपति विद्यादेवी भण्डारीले सामान्य संशोधन गर्न फिर्ता पठाएको नागरिकता विधेयक निर्णयार्थ पेस हुने कार्यसूची पनि छ।

बिहीबार बिहान बसेको प्रतिनिधिसभा कार्यव्यवस्था परामर्श समितिको बैठकमा दलहरूबीच सहमति नजुटेपछि आजै नागरिकता विधेयक पारित गर्ने तयारी छ। नागरिकता विधेयक पारित गर्ने कार्यसूची सार्वजनिक भएलगत्तै एमाले अध्यक्ष केपी ओली गृहजिल्ला झापा पुगेका छन्।

पार्टी कार्यक्रममा सहभागी हुन ओली झापा पुगेका हुन्। केही दिनअघि पनि ओली तीन दिनसम्म झापा बसेर फर्केका थिए। आगामी प्रदेश र प्रतिनिधिसभा निर्वाचनको तयारीका लागि ओली गृहजिल्ला गएको नेताहरूले बताएका छन्।

प्रकाशित मिति: : 2022-08-18 12:31:00

प्रतिकृया दिनुहोस्