प्रधानमन्त्री पुष्पकमल दाहाल ‘प्रचण्ड’ ले देशमा भएका परिवर्तनलाई संस्थागत गर्दै जनाताको सुशासन र समृद्धिको सपना पूरा गर्ने प्रतिबद्धता व्यक्त गरेका छन्।
उनले भने, 'परिवर्तन भए पनि सुशासन र विकासको अपेक्षा पूरा हुँदैन कि भन्ने जनताको चासो र चिन्ता छ, जनताको यो अपेक्षा पूरा हुन्छ।' गोकर्णस्थित जगडोलमा निर्माण गरिएको ‘राष्ट्रिय शहीद तथा बेपत्ता स्मृति पार्क’ को आज उद्घाटन गर्दै प्रधानमन्त्री दाहालले यस पटक सुशासन, विकास र समृद्धिका मानकहरु बनाउने बताए।
उनले समृद्धि, सुशासन र सामाजिक न्यायको सपना पूरा गर्न वर्तमान सरकार निरन्तर कटिबद्ध रहेको समेत प्रस्ट पारे। प्रधानमन्त्री दाहालले भने, 'देशको विकास, समृद्धि, राष्ट्रिय एकता र लोकतन्त्रका निम्ति इतिहासको विभिन्न कालखण्डमा शहीदहरूले बगाएको रगत र त्यसलाई सम्मान गर्ने प्रक्रियासँग जोडिएको हुन्छ, देश र जनताका निम्ति प्राणउत्सर्ग गर्ने महान् शहीदप्रति जति सम्मान हुन्छ, त्यस देशमा राष्ट्रिय एकता, शुसासन, समृद्धि र विकासको यात्रा पनि त्यति नै सहज ढङ्गले अगाडि बढ्न सक्दछ।'
नेपालमा अहिलेसम्म भएका शहीदका अभिलेख राख्ने र त्यसलाई राष्ट्रको सम्पत्ति र नेपाली जनताको आस्थाको धरोहरका रुपमा लिने उनको भनाइ छ। राष्ट्रिय शहीद तथा बेपत्ता स्मृति पार्क निर्माणका निम्ति अर्थ मन्त्रालयबाट निकासा हुन बाँकी केही रकम जतिसक्दो चाँडो निकासाका निम्ति पहल गर्ने प्रतिबद्धता व्यक्त गर्दै प्रधानमन्त्री दाहालले पार्क निर्माणलाई शहीदको सम्मान र शान्ति सम्झौताको स्मृृतिको पार्कका रुपमा महसुस गरेको उल्लेख गरे।
उनले भने, 'आज यो पार्क उद्घाटन गर्दैगर्दा मैले विस्तृत शान्ति प्रक्रियामा हस्ताक्षर गरेको दिनलाई सम्झिएको छु, त्यही शान्ति सम्झौताले नै नेपाल आज यो राजनीतिक प्रक्रिया अगाडि बढेको छ।' प्रधानमन्त्री दाहालले पार्कमा प्रथम शहीद लखन थापादेखि पछिल्लो आन्दोलनमा शहीद भएका शहीदका अभिलेखीकरण राख्ने कार्यको उच्च प्रशंसा गर्दै शहीदको सम्मान युगयुगसम्म अमर रहने विश्वास व्यक्त गरे।
पार्कमा १२ हजार ६५ जना शहीदहरुको अभिलेखीकरण गरिएको छ। त्यसैगरी एक हजार तीन सय ५७ बेपत्ताका अभिलेखीकरण गरिएको छ। प्रधानमन्त्री दाहालले अभिलेखीकण गरिएको शहीद र बेपत्ताका नाम अभिलेखमा छुटेको बताउँदै सरकारका तर्फबाट मन्त्रिपरिषद्मा निर्णय गरेर छुटेका शहीदको पनि अभिलेख राख्नका निम्ति पहल गर्ने बताए। पार्कलाई अझ सुन्दर र व्यवस्थित बनाउने, शहीदहरुको बलिदानबाट प्रेरणा लिएर राष्ट्रिय एकतालाई अझ मजबुद बनाउने उनको भनाइ छ।
