कप्तान किरन पोलार्डको सानदार पारीसँगै मुम्बई इन्डियन्सले भारतमा जारी इन्डियन प्रिमियर लिग (आईपिएल) मा किङ्स इलाभेन पञ्जाबलाई हराउँदै तेस्रो स्थानमा उक्लिएको छ।
पोलार्डले मात्र ३१ बलमा १० छक्का र ३ चौकासहित ८३ रन बनाएपछि पञ्जावलाई अन्तिम बलमा ३ विकेटले हराउँदै मुम्बईले रोमाञ्चक जित निकालेको हो।
पञ्जाबले दिएको १९८ रनको बिशाल लक्ष्य पछ्याउने क्रममा मुम्बईले अन्तिम बलमा ७ विकेट गुमाउँदै विजयी भयो।
मुम्बईलाई जिताउन कप्तान पोलार्डसँगै क्वान्टेन डेककले २४, सूर्यकुमार यादवले २१, हार्दिक पाण्ड्याले १९ तथा सिद्धेश लाद र अल्जारी जोशेफले १५-१५ रन बनाए। जोशेफले विजयी रन प्रहार गर्दै नटआउट रहे।
पञ्जावका लागि मोहम्मद शामीले ३ विकेट लिए पनि टिमलाई जिताउन सकेनन्।
यसअघि ओपनर के एल राहुलले सानदार शतक प्रहारसँगै मुम्बईको घरेलु मैदान वानखडेमा टस हारेर पहिला ब्याटिङ थालेको पन्जावले निर्धारित २० ओभरमा ४ विकेट गुमाउँदै १ सय ९७ रन बनाएको थियो।
पन्जाबका लागि ओपनर के एल राहुलले सानदार शतक प्रहार गरे । राहुल ६४ बलमा समान ६ चौका र छक्का प्रहार गर्दै १ सय रनमा नट आउट रहे।
त्यस्तै अर्का ओपनर क्रिस गेलले ३६ बल खेल्दै ७ छक्का र ३ चौका प्रहार गर्दै ६३ रनको योगदान दिए।
गेल र के एल राहुलले पहिलो विकेटका लागि १ सय १६ रनको साझेदारी गर्दै उत्कृष्ट सुरुवात दिलाएका थिए।
पन्जावका लागि करुण नायर ५, डेविड मिलर ७ र साम करन ८ रनमा पेभिलिएन फर्किएका थिए।
मुम्बईका लागि हार्दिक पान्ड्याले २ विकेट लिएका थिए। त्यस्तै जसप्रित बुमराह र जोसन बेहरनडोफले समान १ विकेट आफ्नो नाममा लेखाए।
अभ्यासको क्रममा घाइते हुँदा आज कप्तान रोहित शर्मा बिनै मुम्बईले खेल जितेको हो।
यो जितसँगै मुम्बई ६ खेलबाट ४ जितसहित ८ अंक जोड्दै अंक तालिकाको तेस्रो स्थानमा उक्लिएको छ। पराजित पञ्जाव ७ खेलबाट समान ८ अंक जोडे पनि रनरेटका आधारमा चौथो स्थानमा झरेको छ।
