हजुरआमाका कथा खोज्ने क्रममा म ८८ वर्षीया सान्नानीको कथा सुन्दै थिएँ।
सापकोटाकी छोरी, तिमिल्सिनाकी बुहारी।
जन्मस्थल काभ्रेपलाञ्चोक जिल्ला, धुलिखेल।
'हाम्रो जन्मथात त नइगाउँ भन्छ। कुसादेवीमा। थाहा छ कुसादेवी?' सान्नानीको प्रश्नमा मैले थाहा नभएको टाउको हल्लाएँ।
उनले प्रस्ट्याउने कोशिश गरिन्, 'त्यहाँ एउटा देवीको मन्दिर छ। त्यो मन्दिरमा मंसिर पूर्णेमा सत्तरी लाख बत्ती बाल्थे पहिलेपहिले। हो त्यही ठाउँमा, जजमानी गरेर खानेहरूलाई दुई गह्रा साना खेत कुस रोप्न दिइएको रहेछ। त्यसैले त्यो ठाउँको नाम कुसादेवी राखेको।'
धुलिखेलकी उनी बिहे गरेर ललितपुरको टुङगुन आएकी रहिछन्।