विराट कोहलीको कप्तानीमा रहेको रोयल च्यालेन्जर्स बैंगलोरले भारतमा जारी इन्डियन प्रिमियर लिग (आईपीएल) मा लगातार छैठौं पराजय व्यहोरेको छ।
आइतबार भएको पहिलो खेलमा दिल्ली क्यापिटल्ससँग ४ विकेटले पराजित हुँदै रोयल च्यालेन्जर्स बेंगलोरले छैठौं पराजय व्यहोरेको हो। यो हारसँगै बेंगलोरको प्ले अफको सम्भावना कठिन बनेको छ।
बैंलोरदे दिएको १ सय ५० रनको लक्ष्य दिल्लीले १८.५ ओभरमा ६ विकेट गुमाएर पुरा गर्यो।
दिल्लीको जितमा कप्तान श्रेयस ऐरले सर्वाधिक ६७ रन बनाए। ५० बल खेलेका उनले ८ चौका र २ छक्का प्रहार गरेका थिए।
यस्तै ओपनर पृथ्वी शाले २८ रन बनाउँदा विकेटकीपर ऋषभ पन्त १८ रन जोडे। शिखर धवन शून्य रनमा पवेलियन फर्किदा कोलिन इनग्रामले २२ तथा अक्षर पटेलले ४ रन जोडे।
बेंगलोरका नवदीप सैनीले २ तथा पवन निगी, टिम साउदी, मोइन अली र मोहम्मद सिराजले समान १-१ विकेट लिए पनि जित दिलाउन सकेनन्।
यसअघि घरेलु मैदान चिन्नास्वामी स्टेडियमा टस हारेर पहिला ब्याटिङ गरेको बेंगलोरले निर्धारित २० ओभरमा ८ विकेट गुमाउँदै १ सय ४९ रन बनाएको थियो।
बेंगलोरका लागि कप्तान विराट कोहलीले ४१ रन जोड्दा मोइन अलीले ३२, एवी डी भिलियर्स १७, मार्कस स्टोइनिस १५ र अक्ष्यदीप नाथ १९ रन बनाउँदा पार्थिव पटेल ९ रन जोडे। अन्य ब्याट्सम्यानले खासै प्रर्दशन गर्न सकेनन्।
दिल्लीका लागि कागीसो रबाडाले ४ विकेट लिए। यस्तै क्रिस मोरिसले २ विकेट लिँदा अक्षर पटेल र सन्दीप लामिछानेले समान १-१ विकेट लिए।
प्रतियोगिताकै महंगा खेलाडी बनेका सन्दीपले १ विकेट लिने क्रममा ४ ओभर बलिङ गर्दै ४६ रन खर्चिएका थिए।
यो नतिजासँगै बेंगलोर ६ खेलबाट कुनै पनि अंक जोड्न नसकी अंकतालिको पुछारमा छ।
बेंगलोरका लागि अब प्ले अफ सम्भावना अंक गणितीय मात्र बाँकी छ। बाँकी सबै खेलमा फराकिलो अन्तरले विजयी भए र अन्य टोलीको नतिजा आफू अनुकुल आउन सके मात्र बेंगलोर नाटकीय रुपमा प्लेअफमा पुग्नेछ।
यता ६ खेलमा ३ जित निकालेको दिल्ली तालिकाको पाँचौ स्थानमा उक्लिएको छ।
