विराट कोहलीको नेतृत्वमा रहेको रोयल च्यालेन्जर्स बेंगलोरले भारतमा जारी इन्डियन प्रिमियर लिग (आईपीएल) मा सुखद अन्त्य गरेको छ।
शनिबार घरेलु मैदानमा भएको रोमाञ्चक खेलमा सनराइजर्स हैदरावादलाई ४ विकेटले हराउँदै प्रतियोगिताको सुखद अन्त्य गरेको हो।
१ सय ७६ रनको लक्ष्य पछ्याएको बेंगलोरले ४ बल बाँकि छँदैमात्र ६ विकेट गुमाएर भेट्टायो।
बेंगलोरको जितमायुवा खेलाडी शिम्रन हिटमायरले ७५ रनको उत्कृष्ट इनिङ्स खेले। ४७ बल खेलेका उनले ४ चौका र ६ छक्का प्रहार गरेका थिए।
चौथो विकेटका लागि गुरकीरतसिंह मान र हिटमायरले १ सय ४४ रनको कीर्तिमानी साझेदारी गरेपछि हैदरावाद पराजित हुन पुगेको हो। चौथो विकेटका लागि गरेको यो आईपीएलको इतिहासमै उच्च साझेदारी हो ।
उत्कृष्ट ब्याटिङ गरेका गुरकीरतसिंह ४८ बल खेलेर ८ चौका र १ छक्का प्रहार गर्दै ६५ रनमा आउट भए।
खराब सुरूवात गरेको बैंलोरको एक समय २० रनमै ३ विकेट गुमाएको थियो।
पहिलो ओभरको तेस्रो बलमै पार्थिव पटेल शून्य रनमा आउट भए। दोस्रो ओभरको पाँचौ बलमा कप्तान विराट कोहली ७ बलमा २ चौका र १ छक्का प्रहार गर्दै १६ रन जोडेर आउट भए। एक ओभरपछि एवी डि भिलियर्स पनि १ रनमा आउट भएपछि बैंलोर धरमराएको थियो। तर गुरकीरतसिंह मान र हिटमायरले सतकीय कीर्तिमानी साझेदारी गर्दै टोलीलाई महत्वपूर्ण जित दिलाए।
हैदरावादका खलिल अहमदले ३ विकेट लिँदाभुवनेश्वर कुमारले २ र राशिद खानले १ विकेट लिए।
यसअघि बेंगलोरको घरेलु मैदान चिन्नास्वामी स्टेडियमा टस हारेर पहिला ब्याटिङको निम्तो पाएको हैदरावादले २० ओभरमा ७ विकेटको क्षतिमा १ सय ७५ रन बनाएको थियो ।
हैदरावादका लागि कप्तान केन विलियम्सनले अर्धसतकीय इनिङ्स खेले। ४३ बल खेलेका उनले ५ चौका र ४ छक्कासहित ७० रनमा नटआउट रहे।
विलियम्सन बाहेक हैदरावादका अन्य कुनै पनि ब्याट्सम्यानले जिम्मेवारीका साथ ब्याटिङ गर्न सकेनन् । सर्वाधिक रन बनाउने ओपनर डेविड वार्नर र जोनी बयरस्टो अष्ट्रेलिया फर्किएपछि हैदरावाद ठूलो समस्यामा पर्यो।
रिद्धीमान शाहले २० रन जोड्दा मार्टिन गुप्टिल ३० रनमा आउट भएका थिए। मनिष पान्डे ९ र विजय शंकर २७ रनमा आउट भए।मोहम्मद नाबी ठूलो शट खेल्ने धुनमा ४ रनमा क्याच आउट भएका थिए।
बेंगलोरका वाशिन्टन सुन्दरले ३,नन्दीप सैनीले २,युजवेन्द्र चाहलले १ विकेट लिए ।
योसँगै हैदरावादको अघिल्लो चरण प्रवेश सम्भावना कठिन बनेको छ। आईतबार मुम्बईसँग कोलकता फराकिलो अन्तरले पराजित भए नेट रन रेटमा हैदरावाद र कोलकता मध्ये एक टोली प्ले अफ पुग्नेछ। कोलकता विजयी भए हैदरावादको अघिल्लो चरण समाप्त हुनेछ।
चेन्नई,मुम्बई र दिल्ली प्ले अफमा पुगिसकेका छन् । बेंगलोरले १४ खेलमा ५ मा जित र ८ मा हारका साथ सातौं स्थानमा रहँदै यो संस्करणको आईपीएल अन्त्य गरेको छ।
