मलाई डर छ
मैले हररात देख्ने दु:स्वप्नहरू
कहीँ मेरै आँखा सामुन्ने
विषाक्त विपना भएर नउभिऊन्
मलाई डर छ.....।
प्राय:
हरेक रात
ठूला ठूला पहाडका देवहरू
बादलका आकृतिझैँ
रूपान्तरित हुन्छन्
विशालकाय दानव-आकृतिमा
र
मुख बाएर
प्रलयको विभीषिका गर्जिँदै
दौडिन्छन् मैतिर
टा.........ढा टा........ढासम्म लखेट्दै
अनकण्टारमा
झम्टिन्छन्
भोकी बघिनीझैँ
म
प्रत्येक बिहान नींद टुट्ने बित्तिकै
चारैतिर
संत्रस्त आँखा घुमाएर हेर्ने गर्छु
मलाई डर छ
कतै मेरो छायाले मैलाई ननिलोस्
दुर्भाग्यको अजिङ्गर भएर
मलाई डर छ.......।
कहिले,कवाजमा उत्रिएको फौजसरह
देवदारुको घना जङ्गल
विराट सेनामा परिणत हुन्छ
शत्रु पक्षको
र
अभेद्य चक्रव्यूह बनेर
अघि बढ्न थाल्छ
म
मन र मुटुभरि
मुरी मुरी मृगतृष्णा बोकेर
एउटा पराजित बादशाहझैँ
बेतोड भागिरहेको हुन्छु
कहालिलाग्दो मरुभूमिमा
काँतर नजरका आँचल फैलाएर
दिशा विदिशामा
सहायताको भीख माँगिरहेको हुन्छु
त्यहाँ-
मुख बङ्ग्याएर गिजाइरहेका हुन्छन्
मलाई मेरै अनुचरहरू
म पसिनाले लथपथ
मडारिइरहेको हुन्छु ओछ्यानमा
मलाई डर छ
बागी नबनून् मेरा अवयवहरू
मेरै विद्रोहमा
मलाई डर छ.....।
मेरो आस्थाको सरोवर
एकरात
निर्मम सुनामीमा बदलिन्छ र
बगाइदिन्छ
मैले देखेका केही
आशावादी सपनाहरू
उफ्!
मेरा अङ्ग अङ्गबाट
प्याजका पत्रझैँ
पत्र पत्र भएर उप्किन्छन्
मेरा शील र सदाचारहरू
मेरो चरित्रको निर्माणाधीन भवन
तासको महलजस्तै
असरल्ल छरिन्छ भैँभरि
म अत्तालिइरहेको हुन्छु
निंद्रैमा
मलाई डर छ
मेरो प्रेमको महल
भताभुङ्ग नहोस्
मेरै लाशमाथि
मलाई डर छ.....।
अचेल-
अजस्र बगिरहेकी ऐरावती देख्ने गर्छु
सपनामा
जससँगसँगै
अघि बढिरहेको हुन्छु म
अनन्त जीवनको सागर भेट्न
हो
अचेल
खाखाभोराजीको आरोहणमा
हिउँका खुड्किला उक्लिरहेको हुन्छु
सगरमाथाको सर्वोच्च शिखर छुन
तर-
सशङ्कित मन छट्पटाइरेको हुन्छ
सपनामा।
मलाई डर छ
झीनो आशाको एक किरण
यो सपना पनि
कतै छताछुल्ल नपोखियोस्
शीतका सपनातुल्य
जत्रतत्र
बूँद बूँद भएर
नछिरल्लियोस्
मलाई डर छ.......।
◦ ऐरावती- उत्तर म्यान्माबाट दक्षिणतिर बग्दै याँगौँ पुगेर समुद्रमा मिसिएकी एक प्रसिद्ध नदी।
◦ खाखाभोराजी- उत्तर म्यान्मारमा स्थित उच्च हिमशिखर।
