नेकपा एमाले स्याङ्जाको अध्यक्षमा सूर्यप्रसाद गैह्रे निर्वाचित भएका छन्। आठौं जिल्ला अधिवेशनबाट गैह्रेको अध्यक्षतामा नयाँ कमिटी बनेको हो। निकटतम प्रतिस्पर्धी नारायणप्रसाद मरासिनीलाई पराजित गरी गैह्रे एमालेको जिल्ला अध्यक्ष बने।
फागुन २३ को सर्वोच्चको फैसलासँगै माओवादी केन्द्रबाट एमाले छिरेका गैह्रेले पराजित गरेका मरासिनी प्रतिनिधिसभा सांसद समेत हुन्।
गैरेले ४ सय ४० मत ल्याउँदा मरासिनीले २ सय ५७ मत मात्रै पाए। उपाध्यक्षमा कृष्ण खाँण निर्विरोध चयन भए भने सचिवमा राजेन्द्र डुम्रे निर्वाचित भए। उपसचिवमा विश्व पौडेल र तारा शर्मा विजयी भएका एमाले स्याङ्जाले जनाएको छ। पौडेल मरासिनी प्यानलबाट निर्वाचित भएका हुन् भने अरू सबै गैह्रेको प्यानलबाट चुनाव लडेका थिए।
गैह्रेलाई केन्द्रीय सचिव पद्मा अर्यालको समर्थन थियो। मरासिनीलाई एमाले संगठन विभाग प्रमुख खगराज अधिकारीले समर्थन दिएका थिए। माओवादीबाट वैद्य समूहसँगै निस्किएका गैह्रे पुनः माओवादीमै फर्किएर रामबहादुर थापा बादलसँग एमालेमा मिसिएका हुन्।
मरासिनी सुरुदेखि नै एमाले (केपी ओली गुट) मा थिए। ११ वटा पालिकाबाट आठौँ अधिवेशनको लागि ७ सय १० जना प्रतिनिधि छानिएका थिए।
