माध्यमिक शिक्षा परीक्षा (एसईई) आजदेखि सुरु हुँदैछ।  राष्ट्रिय परीक्षा बोर्ड, परीक्षा नियन्त्रण कार्यालयका अनुसार देशभरका दुई हजार ७९ परीक्षा केन्द्रबाट आज बिहान ८ बजेदेखि एसईई सञ्चालन हुनेछ।

यस वर्षको एसईई आजदेखि सुरु भएर यही चैत १९ गतेसम्म सञ्चालन हुनेछ । परीक्षा बिहान ८ देखि ११ बजेसम्म सञ्चालन हुनेछ।

परीक्षा तालिकाअनुसार पहिलो दिन अनिवार्य अङ्ग्रेजी तथा संस्कृत वेदविद्याश्रमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा सञ्चालन हुनेछ।
यस वर्षको माध्यमिक शिक्षा परीक्षामा पाँच लाख १४ हजार ७१ जना विद्यार्थी सहभागी हुने पनि बोर्डले जनाएको छ। 

गत वर्ष २०८० को एसईई परीक्षामा चार लाख ६४ हजार ७८५ जना विद्यार्थी सहभागी भएका थिए । यस वर्षको परीक्षामा विद्यार्थीको सङ्ख्या ४९ हजार २८६ जना बढेको छ।
परीक्षामा १५० जनासम्म परीक्षार्थी भएको केन्द्रमा एकजना सहायक केन्द्राध्यक्ष र २० जना विद्यार्थी बराबर एकजना निरीक्षक खटाउने प्रबन्ध गरिएको छ।
परीक्षामा ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिएको कार्यालयले जनाएको छ।

यसपपटक एसईईमा जापानबाट ३७ जना विद्यार्थी सहभागी हुनेछन्। 
राेजगारीका सिलसिलामा जापान गएका नेपालीका छाेराछाेरीले त्यहिँबाट एसईई दिनेछन्। त्यसका लागि नेपालबाटै प्रश्नपत्र र उत्तरपुस्तिका पठाइएको छ। उनीहरूकाे उत्तर पुस्तिका भने नेपालमै जाँच हुनेछ। 

जापानको टोकियो रहेको एभरेस्ट इन्टरनेसनल स्कुलमा नेपाली पाठ्यक्रम पनि पढाइ हुन्छ। त्यसका लागि सन् २०१३ देखि दूतावासकाे समन्वयमा पढाइ सुरु भएकाे हाे।