प्रदेश नम्बर २ को स्थायी राजधानी जनकपुरधाम नै कायम हुने भएको छ । प्रदेशको नामाकरण र राजधानी टुंगो लगाउने सन्दर्भमा सभामुख सरोजकुमार यादवको संयोजकत्वमा गठित संसदीय विशेष समितिमा प्रदेशको राजधानी जनकपुर तोक्ने सहमति जुटेको हो ।
राजधानी जनकपुर नै कायम गर्ने निर्णय समितिमा सर्वसम्मतिले पारित भएको समिति संयोजक समेत रहेका सभामुख सरोजकुमार यादवले लोकान्तरलाई जानकारी दिए । समितिले प्रदेश राजधानीको सीमा पनि टुंगो लगाएको छ । यो प्रस्ताव प्रदेशसभाको दुईतिहाइ बहुमतले पारित गरेपछि राजधानीको अन्तिम टुंगो लाग्नेछ ।
