म हूँ पाहुना एक यात्री धरामा
परेकोछु आई यहाँ पिन्जरामा
सबैला पुकारेँ म मागेँ दुहाई
न आए नसोधे कसैले मलाई ॥१॥
म बुझ्दै गएँ क्यै यहाँको व्यवस्था
सुधारें म आफै म मेरो अवस्था
यहाँ कर्मको रैछ ठूलो प्रभाव
सबै ज्ञान पाई सुधारें स्वभाव ॥२॥
त्यसै कर्मलाई विधाता भनेका
कतै रूप आकारमा नै बनेका
सबैले पुकारा गरेको म देखें
जगत्को कथाकाव्य सर्वस्व लेखें ॥३॥
म मानें धरा ता अनौठो रहेछ
असामान्यताले सबै यो बनेछ
म हूँ एक द्रष्टा र साक्षी यहाँको
यहाँ आज आएछु भोली कहाँ हो ॥४॥
(भुजङ्गप्रयात छन्द)
