हर रात सपनीमा ऐंठन हुन्छ
गाउँमा सायद पहिरो गयो कि…
२०५६ सालमा विप्लव प्रतीकले लेखेको कविता गीत बन्यो। संगीत र स्वर दिए दीप श्रेष्ठले। गीतले चर्चा बटुल्यो, हिट्स एफएमको ४ वटा अवार्डसहित। नेपाली भाषी र संगीत प्रेमी भएका हरेक ठाउँबाट गीतको तारिफसहित खबरहरू आए।
त्यतिबेला गीत सफल हुनुको अर्थ थियो - गायक, गीतकार वा संगीतकार सबै सफल हुनु। स्रोताले ती सर्जकको नयाँ रचना पर्खनु। प्रतीक्षा हुन्थ्यो रेडियो र टेलिभिजनमा त्यस्तै नयाँ गीत।
यो त्यस समयको कुरा हो जब शब्दले समेटेको कल्पनशीलताबारे बहस हुन्थ्यो।
हर रात सपनीमा ऐंठन हुन्छ… को आधिकारिक भिडियो कहिल्यै बनेन। वर्षौपछि दार्जिलिङका केही युवाले कभर भिडियो बनाएर युट्युबमा राखे। भिडियो एक लाख पटक पनि हेरिएको छैन। तर, गीत गुञ्जन छाडेको छैन। कालजयी बनेको छ त्यो गीत।
गीत शक्तिशाली भए भिडियो नचाहिने तर्क गर्छन् गीतकार प्रतीक।
तर, प्रविधिले फड्को मार्दा भिडियो निर्माण र प्रसारणका लागि माध्यम फराकिलो बन्यो। दर्शक, स्रोताले रेडियो नेपाल वा नेपाल टेलिभिजनका सांगीतिक कार्यक्रम पर्खेर बस्नु पर्ने स्थिति छैन। खर्च सस्तियो। यस्तो अवस्थामा गीतका शब्दलाई दृश्यांकन सहज बनेको छ।
‘शब्दहरूलाई लयले गीत बनाउँछ। गीतलाई संगीतले पूर्ण बनाउँछ। त्यसपछि हुने संयोजनलगायतको कामपछि एउटा रचना पूर्ण बन्छ। त्यो पूर्णतामा नयाँ आयाम थप्ने काम गरेको छ भिडियोले,’ प्रतीकले भने।
