आसन्न प्रतिनिधि सभा तथा प्रदेशसभा निर्वाचनमा अर्घाखाँचीमा नेकपा एमाले र सत्तागठबन्धनबाट पुरानै अनुहार दोहोरिने निश्चित जस्तै देखिएको छ।
प्रतिनिधि सभामा एमालेले केन्द्रीय सचिव टोपबहादुर रायमाझीको नाम सर्वसम्मत सिफारिस गर्दा नेपाली कांग्रेसले कांग्रेस नेत्री पुष्पा भुसालसहितको नाम पठाएको छ।
सभापति देउवा निकट मानिएकी भुसाल पार्टीभित्रको गुट समिकरणका कारण उम्मेदवार बन्नबाट रोकिएको अवस्थामा बाहेक सामान्य अवस्थामा भुसाल बाहेक अरूले उम्मेदवारी पाउने संभावना नरहेको कांग्रेस स्रोतले जनाएको छ।
गठबन्धनमा रहेका दलहरूबीच अर्घाखाँची कांग्रेसले लिने सहमति भएका विवरण बाहिर आइसकेको अवस्थामा यसपटक पुरानै उम्मेदवार मैदानमा देखिने भएका छन्। यद्यपि स्वतन्त्र उम्मेदवार को आउने हो भन्ने चर्चाको विषय बनेको छ।
दुवैलाई स्वतन्त्रको डर
कांग्रेस नेत्री पुष्पा भुसाल चुनावको बेला बाहेक बिरलै अर्घाखाँचीमा देखिने नेत्री हुन्।
अर्घाखाँची आउदै नआएको आरोप लाग्ने गरेकी भुसालले चुनावको मिति नजिकिएसँगै अर्घाखाँचीमा सक्रियता बढाएकी छन्। केही दिनअघि अर्घामा कम्वल बाँड्न पुगेकी भुसालको सामाजिक सञ्जालमा आलोचना समेत भएको थियो।
यता एमालेबाट सर्वसम्मत सिफारिस भएका रायमाझी माओवादी परित्याग गरेर एमाले प्रवेश गरेका हुन्। प्रायजसो अर्घाखाँचीमा देखिने रायमाझीलाई पदको लोभमा पार्टी परिवर्तन गर्ने गरेको आरोप छ।
दुवैजना पुराना अनुहारको विचमा स्वतन्त्र उम्मेदवार को आउछ भन्ने विषयले समेत निर्वाचनको परिणाममा प्रभाव पार्ने अड्कालवाजीहरू भएका छन्। सामाजिक सञ्जालमामा केही चर्चा परिचर्चा हुनेगरेको भएपनि अर्घाखाँचीमा हालसम्म कुनैपनि व्यक्तिले स्वतन्त्र उम्मेदवारी घोषणा भने गरिसकेका छैनन्।
