इजरायली इतिहासकार तथा लेखक युभल नोहा हरारीका अनुसार मानव कथामा विश्वास गर्ने प्राणी हो। उनले आफ्नो पुस्तक ‘स्यापियन्स: अ ब्रिफ हिस्ट्री अफ म्यानकाइन्ड’ मा कसरी वस्तुनिष्ठ वास्तविकता नभएका धर्म, राष्ट्र, प्रणाली, पैसा आदि मानवीय परिकल्पनाबाट सृजित ‘कथाहरू’ ले मानव सभ्यतालाई डोर्याउन थाले भन्ने विषय उजागर गरेका छन्।
जब यी मानवीय कल्पनालाई सबैले विस्तारै विश्वास गर्दै जान थाले, तब यिनको भौतिक अस्तित्व नभए पनि वास्तविकतामा परिणत हुन थाले। जति धेरै जनाले र जति गहिरो विश्वास गर्न थाले, त्यो ‘कथा’को प्रभाव उत्तिकै पर्न थाल्यो।
यसरी कुनै एक कथा वा विचारले बाँधिएर धेरै मानिस एउटा साझा उद्देश्यको लागि काम गर्न सुरु गरेपछि मात्र मानव सभ्यताले फड्को मार्न सुरु गर्यो। विभिन्न सामाजिक, आर्थिक, राजनैतिक तथा सांस्कृतिक परिस्थितिले देशहरूको उत्पत्ति र विकास हुन थाले। जसलाई मूर्तरूप दिन धेरै जना लागिपरे।