२८ वैशाख, काठमाडौं । नेपालमा पछिल्लो एक महिनामा ३ वटा हेलिकप्टर दुर्घटना भए, २५ चैतमा ह्याम्स अस्पतालको हेलिप्याडमा एयर डाइनेस्टी, २६ चैतमा धौलागिरि हिमालको बेसक्याम्पमा एभरेस्ट हेली र २३ वैशाखमा सिम्रिक एयरको हेलिकप्टर दुर्घटनामा परे ।
११ वैशाखमा त्रिभुवन अन्तर्राष्ट्रिय विमानस्थलबाट फ्लाइ दुबईको विमान उड्नासाथ ठूलो आवाजसहित आगोको लप्का देखिएको घटना ताजै छ । पछिल्ला दिनमा पटक–पटक आन्तरिक सेवाका विमान उडानका क्रममा गरिरहेका आकस्मिक अवतरणहरुले नेपालको हवाई सुरक्षामाथि चिन्ता बढाएको छ । यस्तै १ माघमा पोखरामा यती एयरलाइन्सको विमान दुर्घटना हुँदा ७२ जनाको मृत्यु भएको घटनाले अन्तर्राष्ट्रिय क्षेत्रसम्म नै नेपालको हवाई यात्रा असुरक्षित रहेको सन्देश दिइसकेको छ ।
