अमेरिकाको क्यालिफर्नियाको लङबीच म्यारियट होटलमा कार्यरत एक कुकलाई प्रहरीले उनकै निबासबाट भारी मात्रामा अत्याधुनिक हातहतियारसहित पक्राउ गरेको छ ।
पक्राउ पर्ने ३७ वर्षीय रोडल्फो मोन्टोया होटलमै कार्यरत सहकर्मी र पाहुनामाथि मास सुटिङ गर्ने योजना बनाइरहेको बेला पक्राउ परेका हुन् । उनकै सहकर्मीहरूले उनको खराव नियतको संकेत पाएपछि प्रहरीलाई जानकारी दिएका थिए ।
सहकर्मीहरूले उपलब्ध गराएको सूचनाको आधारमा प्रहरीले हन्टिङटनस्थित मोन्टोयाको घरमा छापा मारेर उनलाई पक्राउ गरेको हो ।
लङबीच प्रहरी प्रमुख रोबर्ट लुनाले मोन्टोयाले मास सुटिङ गर्ने प्रष्ट नियत राखेर योजना बनाएको बताए । तर, उनको योजना असफल बनाएर धेरैको ज्यान जोगाउन सकिएकोमा उनले सूचना दिने सहकर्मीहरूलाई धन्यवाद दिए ।
मोन्टोयामाथि थप अनुसन्धान भैरहेको बताउँदै चाँडै नै उनलाई अदालता पेश गर्न लागिएको पनि बताए ।
यसअघि गत साता मात्र पनि अमेरिकाका तीन विभिन्न सहरमा योजना बनाइएका सम्भावित मास सुटिङ सर्वसाधारणले दिएको सूचनाका आधारमा टारिएको थियो ।
