अमेरिकाका जिवित जेठो राष्ट्रपतिको कीर्तिमान बनाएका जिमी कार्टर घरमा लडेका छन् । मंगलबार मात्र ९५ वर्ष पुगेका उनी जर्जियाको प्लेनस्थित घरमा लडेका थिए ।
अस्पताल लगेर केही टाँका लगाएर स्वास्थ्यलाभ लिएका उनी घर फर्केका छन् ।
उनी आफ्नो पूर्वनिर्धारित कार्यक्रमअनुसार नै टेनेसीको नासभिल घर बनाउने काममा सहभागी हुनेछन् ।
कार्टर फाउन्डेसनले त्यहाँ ह्याविट्याट फर हुम्यानिटीसँग मिलेर विपन्न वर्गका मानिसका लागि २१ घर बनाइरहेको छ ।
त्यही क्रममा अक्टबोर ६ देखि ११ सम्म उनी त्यहाँ रहने कार्यक्रम रहेको छ ।
गत मेमा पनि उनी घरमै लडेका थिए । तर, त्यसपछि पनि उनले ह्याविट्याट फर हुम्यानिटीसँगको सहकार्य जारी राखेका थिए ।
जिम्मी कार्टरले नेपालको पनि भ्रमण गरेका छन् । उनको कार्टर फाउन्डेसनले नेपालमा चुनाव पर्यवेक्षण गर्नुका साथै केही कल्याणकारी काम पनि गरेको छ ।