ओमानले आईसीसी विश्वकप क्रिकेट लिग–२ अन्तर्गत त्रिकोणात्मक सिरिजको दोस्रो खेलमा अमेरिकालाई पराजित गरेको छ।
बिहिबार भएको खेलमा ओमानले अमेरिकालाई ६ विकेटले पराजित गरेको हो।
अमेरिकाले दिएको २ सय १४ रनको लक्ष्य ओमानले ४९ ओभर ३ बलमा मात्र ४ विकेट गुमाएर पुरा गर्यो।
ओमानको जितमा मोहमद नदीमले अविजित रहदै ५५ रनको अर्धशतकीय इनिङ्स खेले।
यस अघि टियु क्रिकेट मैदानमा टस हारेर पहिले ब्याटिङ गरेको अमेरिकाले ओमानलाई जितका लागि २ सय १४ रनको लक्ष्य दिएको थियो।
अमेरिकाले ५० ओभरमा अलआउट हुँदै २ सय १३ रन बनाएको हो।
अमेरिकाका लागि इयन होल्याण्डले ६५ रनको अर्धशतकीय इनिङ्स खेले। उनले ७८ बलमा ६ चौका प्रहार गरेका थिए। यस्तै ५३ बलमा ३ चौका र २ छक्कासहित अक्षय होमराजले ४४ रनको योगदान दिए।
यता मोनक पटेल १९ र तिमिल पटेल १६ रनमा आउट भए।
ओमानका मोहमद नदीमले ३ विकेट लिए। कप्तान जिशान मकसुद, बिलाल खान र अकीब इलियास २–२ विकेट लिए। कलीमुल्लाहको नाममा १ विकेट रह्यो।
यससँगै ओमानले सिरिजमा लगातार दोस्रो जित निकालेको छ। बुधबार भएको पहिलो खेलमा ओमानले नेपाललाई १८ रनले हराएको थियो।
