मध्य पश्चिमाञ्चल विश्वविद्यालय सुर्खेतअन्तर्गतको इन्जिनियरिङ सङ्कायले नेपाल इन्जिनियरिङ परिषदसँग स्वीकृति नलिइ चार वर्षदेखि ‘बिई हाइड्रोपावर इन्जिनियरिङ’ अध्यापन गराइरहेको पाइएको छ। सङ्कायले मापदण्डअनुसारको कोर्स र ल्याब नै तयार नगरी बिना स्वीकृति १ सय ६६ जनाभन्दा बढी विद्यार्थीलाई पढाइरहेको छ।
हालसम्म पनि परिषद्बाट स्वीकृति नलिएको थाहा पाएपछि बिहीबार हाइड्रोपावर इन्जिनियरिङको चौथो वर्षमा अध्ययनरत विद्यार्थीले क्याम्पस प्रमुख र डिनको कार्यालयमा ताला लगाएका छन्। आगामी असोजमा चौथौ वर्षको पढाइ सकिने, तर ‘सर्टिफिकेट’ नपाउने देखिएपछि विद्यार्थीहरू आन्दोलनमा उत्रिएका हुन्।
