दीपेन्द्र खड्का
गत जेठ ११ गते बिहानै रुकुमको चौरजहारी नगरपालिका–८ मा अन्तरजातीय प्रेमकै कारण १ दलित युवाको हत्या भएको समाचार सुनियो ।
आफू हुर्किएको, खाए खेलेको, पढे लेखेको नगरपालिकामै अपत्यारिलो घटना भएको सुन्दा मन थाम्न सकिएन । मेरो सम्पर्कमा रहेका धेरै साथीहरूले तपाईंको जिल्लामा त यस्तोसम्म भएछ नि भनेर प्रसंग कोट्यान थाले ।
नियमित संवाद भइरहने जिल्लाका जनप्रतिनिधिसँग कुरा गरें । तथाकथित माथिल्लो जातको किशोरीसँगको प्रेमलाई वैधानिकता दिन खोज्दा गरिएको नरसंहारका अगाडि लामो संघर्ष र बलिदानबाट प्राप्त गणतन्त्र फिका भइदियो ।
