चलचित्रकर्मी दयाराम दाहाल चलचित्र विकास बोर्डको अध्यक्षमा नियुक्त भएका छन्।
बोर्डका सदस्य, फिल्म लेखक, निर्देशक तथा गीतकारसमेत रहेका दाहाललाई बिहिबार बसेको मन्त्रिपरिषदको बैठकले अध्यक्षमा नियुक्त गरेको हो।
विगत ६ महिनादेखि रिक्त रहेको चलचित्र विकास बोर्डको अध्यक्ष पदका लागि दाहालसँगै अभिनेता भुवन केसी र चलचित्रकर्मी/ संकृतीविद राजेश थापा अन्तिम तीनमा सिफारिस भएका थिए।
दाहालले अब २ वर्ष विकास बोर्डको नेतृत्व गर्नेछन्। तत्कालिन अध्यक्ष केशव भट्टराईको निधन भएपछि बोर्ड नेतृत्वविहिन भएको थियो ।
नेपाली चलिचत्र क्षेत्रमा लामो समयदेखि सक्रिय रहेका निर्देशक दाहालले बोर्डको सदस्य पदमा रहेर अनुभव हासिल गरिसकेका छन्। यसैले, यो जटिल समयमा उनले बोर्डमा चलचित्रकर्मीको हितका लागि काम गर्ने विश्वास गरिएको छ ।
चलचित्र विकास बोर्डको अध्यक्ष पदका लागि १० जनाको आवेदन परेको थियो। जसमा, अन्तिम ३ जनाको नाम मन्त्रीपरिषद्मा सिफारिस गरिएको थियो।
दयाराम दाहालले निर्देशन गरेको पछिल्लो चलचित्र ‘रानी’ हो । उनले ‘दौतरी, ठूल्दाई, चाँदनी, जंगे, ढुकढुकी, तँ त साह्रै विग्रिस नि बद्री, भरिया, दाइजो, जेठ कान्छो, अग्नी ज्वाला, भाग्य विधाता, दोबाटो, कर्मयोद्धा, अरबपति, दशगजा, फर्केर हेर्दा, कहाँ छौ कहाँ, म तिमी बिना मरिहाल्छु, नेपाल’ लगायतका चलचित्र निर्देशन गरेका छन् ।
