विगत दुई दशकमा कम्तीमा ३८ वटा देशमा बलजफती, धम्की दिएर वा अनिच्छापूर्वक बन्ध्याकरण गराइएको विवरण आएको छ। महिलाहरूलाई सुत्केरी हुने क्रममा पछि सन्तान जन्माउन नसक्ने बनाइएको पाइएको छ।
संयुक्त राष्ट्रसङ्घले प्राध्यापक साम रोलेन्ड्सको अध्ययनअनुसार मानव बसोबास रहेका सबै महादेशमा फेला परेको यो प्रवृत्ति रोक्न र यसमा संलग्न दोषीहरूलाई कारबाही गर्न माग गरेको छ।
जातीय अल्पसङ्ख्यक समुदाय, एचआईभी भएका महिला र अरू अल्पसङ्ख्यक समुदाय र समलिङ्गी व्यक्तिहरूलाई बन्ध्याकरणको लागि बाध्य पारिएको पाइएको छ।
“विश्वव्यापी रूपमा नै बन्ध्याकरणसँग सम्बन्धित विभेद र दुर्व्यवहारको एउटा लामो इतिहास छ,” राष्ट्रसङ्घकी स्वास्थ्यसम्बन्धी अधिकार विषयकी विशेष प्रतिवेदक टेलिङ मुफुकिङले भनिन्।
जबरजस्ती गरिने बन्ध्याकरणलाई आफूलाई मन परेको बाहेक अरूको जनसङ्ख्या नियन्त्रण गर्ने विधिका रूपमा विगतदेखि नै प्रयोग गरेको देखिन्छ।
नाजी जर्मनीसँग पनि यसलाई जोड्ने गरिन्छ। तर अनुसन्धानले इतिहासका पानाहरूमा मात्रै नभई २१ औँ शताब्दीमा पनि बारम्बार यस्तो भइरहेको देखाएको छ।
जीसीलो ड्लुड्लाले दक्षिण अफ्रिकामा सन् २०११ मा आफूले बच्चा जन्माइरहँदा बन्ध्याकरणको अनुमति नदिएको बताइन्। उनी ५० वर्षकी भइन् र तीन सन्तानकी आमा हुन्।
