इलामको चुलाचुली गाउँपालिका वडा नम्बर ३ की २३ वर्षीया अप्सरा गिरी कोरोना संक्रमित भएर २०७८ वैशाख २२ गते विराट मेडिकल कलेजको विराट नर्सिङ होम विराटनगरमा भर्ना भएकी थिइन्।
वैशाख २२ गतेदेखि वैशाख २६ गतेसम्म उनलाई उक्त अस्पतालको आईसीयू वार्डमा राखेर उपचार गरिएको थियो । पाँच दिनसम्म आईसीयूमा उपचारपछि उनलाई वैशाख २६ गते डिस्चार्ज गरिएको थियो ।
पाँच दिनसम्म आईसीयूमा गरिएको उपचार तथा औषधिबापत ३ लाख ५० हजार रुपैयाँ उनले बुझाएकी थिइन्। त्यसपछि उनलाई विराट टिचिङ अस्पतालको जेनरल वार्डमा रिफर गरिएको थियो। त्यहाँ पनि जम्मा ११ दिन उपचार गरेबापत साढे २ लाख रुपैयाँ उनका आफन्तले अस्पताललाई बुझाएका थिए ।
‘दुवै अस्पतालमा जम्मा १६ दिन उपचार गरेबापत जम्मा ६ लाख रुपैयाँ औषधि तथा उपचारमा मात्रै मेरो अभिभावकले बुझाउनुभएको थियो,’ गिरीले भनिन्, ‘मलाई अहिले पनि पूर्ण रूपमा निको भएको छैन । अझै छाति दुख्ने गरेका कारण काममा जान सकेको छैन । घरमा नै बेड रेस्टमा छु ।’
