सविना देवकाेटा
दोस्रो लहरको कोरोना भाइरसको संक्रमण नरोकिँदै गत हप्ता स्वास्थ्य तथा जनसंख्या मन्त्रालयले आगामी १५ असोजदेखि कोरोनाको तेस्रो लहर आउने चेतावनीसहित अस्पतालहरूलाई आवश्यक संरचना तयार पार्न निर्देशन दियो । तर, प्रक्षेपण गरिएको दुई महिनाअगावै नै अस्पतालमा कोरोना संक्रमितको संख्या ह्वात्तै बढेको छ ।
विस्तारै ननकोभिड सेवामा फर्किन थालेका अस्पतालहरू यतिखेर कोभिड- १९ का बिरामीले भरिभराउ हुन थालेका छन् । कोरोना संक्रमणको अघिल्ला लहरमा बेड अभाव खेपेका अस्पतालहरूले बिरामीको चाप बढेसँगै बेडको तयारीमा जुटेका छन् ।
आइतबार मात्रै टेकु अस्पतालले १० शय्याको बेड थपेको छ । त्यस्तै, त्रिवि शिक्षण अस्पतालले पनि १० बेड एचडीयू र २० जनरल ननकोभिडको बेडलाई कोभिड उपचारमा विस्तार गरेको छ ।