सप्तरीको हनुमाननगर कङ्कालिनी नगरपालिका–१ भारदहस्थित कङ्कालिनी मन्दिर नजिक आज अपराह्न भएको दुर्घटनामा एक जनाको मृत्यु भएको छ।
पूर्व–पश्चिम राजमार्गमा भएको दुर्घटनामा झापाको दमक नगरपालिकाका ४२ वर्षीय मेघराज शर्माको घटनास्थलमा नै मृत्यु भएको सप्तरी प्रहरीले जनाएको छ।
पूर्वबाट पश्चिम जाँदै गरेको १८ नम्बर बाहिनी गाईघाट उदयपुरको प्रदेश नम्बर ३–०१–००१ ग ३७२५ नम्बरको वनटेन गाडी र विपरीत दिशाबाट आउँदै गरेको मे १ च ६९२५ नम्बरको पिकअप गाडी एकापसमा ठक्कर खाँदा पिकअप चालक शर्माको मृत्यु भएको हो।
पिकअप गाडीका सहचालक सुनसरीको इटहरी नगरपालिका–५ का ५२ वर्षीया भवानी र नेपाली सेनाको गाडीमा सवार खोटाङको मझुवागढी नगरपालिका–१० का ४२ वर्षीय १८ नम्बर बाहिनी उदयपुरमा कार्यरत जमदार जीवन गरी घाइते भएका छन्।
घाइतलाई उपचारका लागि अस्पताल पठाइएको र सेनाको वनटन गाडी र चालकलाई प्रहरीले नियन्त्रणमा लिएको जिल्ला प्रहरी कार्यालय सप्तरीका सूचना अधिकारी प्रहरी नायब उपरीक्षक माधवप्रसाद काफ्लेले बताए। शव परीक्षणका लागि राजविराजस्थित गजेन्द्रनारायण सिंह अस्पताल ल्याउने तयारी भइरहेको प्रहरीले जनाएको छ। रासस
