कोशी प्रदेश सरकार मन्त्रीपरिषद्को बैठकले सरकारलाई सहयोग गर्ने तीन वटा समिति गठन गरेको छ। बुधबार बसेको मन्त्रीपरिषद्को बैठकले राजनीतिक तथा प्रशासन समिति, कानून न्याय तथा प्रदेश मामिला समिति र आर्थिक सामाजिक तथा पूर्वाधार समिति गठन गरेको हो।
राजनीतिक तथा प्रशासन समितिको संयोजकमा खानेपानीमन्त्री तिलकुमार मेन्याङ्बो रहेका छन् सदस्यहरुमा पूर्वाधार विकास मन्त्री दुर्गा चापागाईं, कृषि मन्त्री भक्ति सिटौला र स्वास्थ्यमन्त्री निर्मला लिम्बू रहेका छन्।
यस्तै कानून न्याय तथा प्रदेश मामिला समितिको संयोजकमा सामाजिक विकास मन्त्री बुद्धिकुमार राजभण्डारी रहेका छन्। उक्त समितिको सदस्यहरुमा पर्यटनमन्त्री जीवन आचार्य, स्वास्थ्यमन्त्री निर्मला लिम्बू र कृषिमन्त्री भक्ति सिटौला सदस्य छन्।
भौतिक पूर्वाधार विकासमन्त्री दुर्गा प्रसाद चापागाईंको संयोजकत्वमा आर्थिक सामाजिक तथा पूर्वाधार समिति गठन भएको छ। यसको सदस्यहरुमा सामाजिक विकासमन्त्री बुद्धिकुमार राजभण्डारी, कृषिमन्त्री भक्ति सिटौला र स्वास्थ्यमन्त्री निर्मला लिम्बू छन्।
यस्तै बैठकले संघबाट हस्तान्तरण भएर आएका पूर्वाधार विकाससँग सम्बन्धीत आयोजनाका लागि ३ अर्ब ४८ करोड ३६ लाख ५० हजार रुपैयाँ माग गरेको सरकारका प्रवक्ता एवं कृषिमन्त्री सिटौलाले जानकारी दिए।
