नेपाली काङ्ग्रेसका नेता डा.शेखर कोइरालाले कार्यकर्ताहरुले नेताहरुलाई प्रश्न गर्न सक्नुपर्ने बताएका छन्। 

शनिबार काठमाडौंमा आयोजित नेपाली काङ्ग्रेस सिन्धुली–काठमाडौं सम्पर्क समितिको प्रथम सम्मेलनलाई सम्बोधन गर्दै उनले कार्यकर्ताहरुले प्रश्न गर्न नसक्ने हो भने ‘दास’ हुने भन्दै कार्यकर्ता कसैको दास नभएको बताए। 
नेपाली काङ्ग्रेस सबैभन्दा ठूलो पार्टी भएर पनि अगाडि बढ्न नसकेको पनि उनको भनाइ छ। 

‘नराम्रोलाई पनि नराम्रो भन्न नसक्ने नेपाली काँग्रेसका कार्यकर्ता हुनै सक्दैनन्’ कोइरालाले भने ‘नराम्रोलाई नराम्रो भन्न सकौं। मैले नराम्रो गर्छु भने पनि किन यस्तो गरेको भन्ने गर्नस्। किनकि हाम्रो भोलीको प्रतिष्पर्धी पनि नेकपा एमाले नै हो। त्यसैले अहिले उसका अराजकताविरुद्ध प्रश्न गर्न सक्नुपर्छ।’

उनले कम्युनिस्ट रहेको सत्ताको चाँबी अब नेपाली काँग्रेसले लिनुपर्ने बेला भएको पनि बताए। 

‘हामी सरकारमा मात्रै छौं। सत्ताको चाँवी त अहिले पनि बामपन्थीहरूसँग छ। अहिले हामी सबैभन्दा ठूलो पार्टी छौ। तर हामी तीन बर्षदेखि कहा छौ? सोध्नु भयो वा सोच्नु भयो? किन यस्तो भइरहेको छ भनेर कहिले सोच्नु भएको छ? सबैभन्दा ठूलो पार्टी हुदाँहुदैँ पनि करिब तीन वर्षदेखि केही भएको छैन् भनेर कसैले कसैलाई प्रश्न गर्दैन्’ उनले भने ‘नेपाली काङ्ग्रेस र माओवादी मिलेर चुनाव लड्यो, माओवादी र एमालेको सरकार बन्यो। तर किन बन्यो भनेर प्रश्न गर्दैनौ। नेताहरुलाई कार्यकर्ताहरुले प्रश्न गर्न सकिदैँन् भने दास हुन्छन् र तपाई हामी कसैको दास होइन्।’

यस्तै, उनले आफैं आफैं बीचमा लड्ने प्रवृत्तिले नेपाली काङ्ग्रेसलाई कमजोर बनाउने भन्दै काङ्ग्रेस आफैंमा चाहीं कमजोर नभएको बताए। 
उनले तल्लो तहका जिल्लाबासीहरुले आफ्ना कुराहरु स्पष्ट रुपले राखेको भन्दै खुसी पनि व्यक्त गरेका छन्। 

उनले भने, ‘काङ्ग्रेस चलाएमान भएन भनेर भन्नुहुन्छ। म त के भन्छु भने काङ्ग्रेस यति धेरै चलाएमान भएको मैले कहिले पाएको थिएन्। मलाई आज खुसी के कुरामा लागेको भने तल्लो तहको जिल्लाबासीले आफ्ना कुराहरु स्पष्ट रुपले राख्नुभयो। तर हामीहरु त्यो सुन्न तयार छैनौ, नेताहरु त्यो सुन्न तयार छैन्।’