काठमाडौं। यस वर्षको शहीद स्मारक ‘ए’ डिभिजन लिग शुरू हुनुअघि साविक विजेता मनाङ मस्र्याङ्दी क्लबबाट मच्छिन्द्र क्लबले कप्तानसहित सात प्रमुख खेलाडी भित्र्यायो।
प्रमुख सात खेलाडी नै टीमबाट बाहिरिएपछि नयाँ सिजनमा मनाङको प्रदर्शन कस्तो होला? लिग शुरू हुनुभन्दा अघिको पत्रकार भेटघाटमा मनाङका प्रशिक्षक फुजा तोपेलाई यस्तो प्रश्न सोधियो। जवाफमा तोपेले भनेका थिए– “केही फरक पर्दैन, हामीसँग नेपाली मेस्सी छन्।”
नेपाली फुटबलमा पनि मेस्सी? हो, जगजित श्रेष्ठलाई त्यही रूपमा हेरिन्छ। होचो कद, बलमाथि गजबको नियन्त्रण, सटिक पास, सुन्दर क्रस अनि सेटपिसमा उत्तिकै उत्कृष्ट। विंगरमा नेपाली फुटबलले पाएका सम्भवतः सबभन्दा राम्रा खेलाडी हुन्, जगजित।
मनाङका प्रशिक्षक तोपेकै भनाई सापटी लिने हो भने ‘नेपाली मेसी’।
