प्रधानमन्त्री केपी ओलीले चितवन माडीको अयोध्यापुरीमा राम मन्दिर बनाउन स्थानीय जनप्रतिनिधिलाई दिएकाे निर्देशनप्रति कांग्रेस प्रवक्ता विश्वप्रकाश शर्माले आपत्ति जनाएका छन् ।
उनले आफ्नो ट्विटमा ‘भक्त चेपाङको घर जलाएर भगवान् रामको मन्दिर बनाउने ? द्वन्द्वात्मक भौतिकवादको यो कस्तो आध्यात्मिक अवतार ? भन्दै प्रश्न गरेका छन् ।प्रवक्ता शर्माले अगाडि लेखेका छन्, ‘यस्तो कर्मले प्रसन्न हुनुहोला भगवान् राम कि घर जलेका भक्तले क्षमा देलान् ? कार्ल मार्क्सको आत्मालाई शान्ति मिल्ला कि 'मिशन लिम्पियाधुरा' लाई बल पुग्ला ?
माडी नगरपालिकाका प्रवक्तासमेत रहेका वडा नम्बर ९ का अध्यक्ष शिवहरि सुवेदीसँग शुक्रबार टेलिफोनमा संवाद गर्दै प्रधानमन्त्रीले तुरुन्तै काठमाडौं आउन निर्देशन दिएका थिए । प्रधानमन्त्रीको निर्देशनपछि मेयर ढकालको नेतृत्वमा एउटा टोली शनिबार बालुवाटार पुगेको थियो ।
दुई घन्टाको छलफलमा प्रधानमन्त्री ओलीले रामको जन्मस्थान माडीको अयोध्यापुरी नै रहेको दाबी गर्दै मन्दिर बनाउन स्थानीय जनप्रतिनिधिलाई निर्देशन दिएका छन् ।
