कोरोना भाइरसको संक्रमणबाट बच्ने उपायहरूबारे त तपाईं-हामीले अहिलेसम्म धेरै नै पढिसकेका छौं, धेरै नै सुनिसकेका छौं। तर, घना बस्ती भएका ठाउँमा हिँडडुल गर्न बाध्य हुनेहरूका लागि कोरोना भाइरसबाट जोगिन अहिले विज्ञ चिकित्सकहरूले केही सामान्य र व्यवहारिक सुझाव दिइरहेका छन्।

कोभिड-१९ को विश्वव्यापी महामारी नेपालमा पनि लगातार फैलिन थालेपछि सार्वजनिक भइरहेका जनहितमा जारी सूचनाहरूमा भनिएजस्तै, साबुनपानीले हात धुने, स्यानिटाइजर प्रयोग गर्ने, भिडभाडबाट टाढै रहने र नाक-मुखलाई मास्क अर्थात् मुखावरणले ढाक्ने उपायहरू हामीसामु छन् नै।

तर सबै बखत ती सबै उपाय अपनाउन सम्भव नहुन सक्छ। अब त्यस्तो बेला के गर्ने त?

नआत्तिनुस्। श्वासप्रश्वास र सरुवा रोगसम्बन्धी विशेषज्ञ चिकित्सकहरूको सुझाव छ- भिडभाड हुने ठाउँमा नजाने र जानै परे नाक-मुख राम्ररी छोपिने गरी मास्क लगाइराख्ने। त्यो मास्क फुकालेर जथाभाबी नथुक्ने। कुरा गर्दा मास्क ननिकाल्ने वा त्यसलाई चिउँडोमा झार्दै फेरि माथि सार्ने बानी छ भने हटाइहाल्ने।