अजय अनुरागी
धनुषामा अवैध तरिकाले क्रसर व्यवसाय तथा बालुवा प्रशोधनको उद्योग सञ्चालनमा रहे पनि अनुगमन गर्ने सरकारी निकायहरू मुकदर्शक बन्ने गरेका छन् ।
कतिपय दर्ता नै नभएका, दर्ता भएपनि नवीकरण नै नगराका, दर्ता बालुवा प्रशोधनका लागि भनेर गर्ने तर काम क्रसरको गर्ने गरेका उद्योगको बिगबिगी भएपनि नियमनकारी निकायले कुनै कारवाही गर्न सकेको छैन । राजस्व छली गर्ने ती उद्योगहरू वातावरण प्रदूषण गर्दै मापदण्डविपरीत सरकारी निकायकै संरक्षणमा सञ्चालित छन् । यहाँसम्म कि अदालतले गरेको परमादेशलाई समेत उद्योगीहरूले अटेर गर्दै आएका छन् । कारवाही गर्नुपर्ने निकाय भने रमिते बनेको छ ।
अदालतको फैसलालाई समेत नटेर्ने क्रसर व्यवसायी
धनुषाको गणेशमान चारनाथ नगरपालिका वडा नम्बर ८ का भगत महतोले मापदण्डविपरीत सरकारी विद्यालयबाट ५ सय मिटरको दूरीभित्र नागेन्द्र साहले संकटमोचन क्रसर उद्योग सञ्चालन गरेको, ध्वनि प्रदूषण तथा वातावरण प्रदूषण गरेका कारण उद्योग सञ्चालनको अनुमति बदर गराई प्रदूषण रोक्नका निम्ति २०७६ साल वैशाख २५ गते उच्च अदालत जनकपुरमा रिट निवेदन दर्ता गराएका थिए ।
