कोरोनाभाइरस (कोभिड–१९) को दोस्रो लहरका कारण देशका धेरैजसो जिल्लामा विगत एक महिनादेखि निषेधाज्ञा छ ।
निषेधाज्ञाको अवस्थामा सबैभन्दा अग्रपंक्तिमा खटिने नेपाल प्रहरी, ट्राफिक प्रहरी, सशस्त्र प्रहरी हो भने नेपाली सेनाले स्वाब संकलन, शव व्यवस्थापन गरिरहेको छ ।
पछिल्लो समय नेपाली सेनाले उपत्यकामा संक्रमणका कारण मृत्यु भएका मानिसहरूको शव व्यवस्थापन पनि गर्दै आएको छ ।
सुरक्षा निकायका कतिपय कर्मचारीमा कोराना भाइरसको संक्रमण भएको छ भने केही निको भएर काममा फर्किएका छन् ।
कोरोनाको उच्च जोखिममा रहेका नेपाल प्रहरी, ट्राफिक प्रहरी, सशस्त्र प्रहरी र नेपाली सेनाका काठमाडौं उपत्यकामा कार्यरत कर्मचारी घर समेत जान पाएका छैनन् ।
कोरोना भाइरसको संक्रमणका कारण महानगरीय प्रहरी परिसर काठमाडौंका प्रहरी नायब उपरीक्षक (डीएसपी) राजकुमार केसीले ज्यान गुमाए ।
नेपाली सेनाका एक जर्नेलले समेत ज्यान गुमाइ सकेका छन् ।
सडकमा दिनानुदिन खटिएकै कारण काठमाडौं उपत्यकाका सुरक्षा कमान्डरहरू आफ्नो घरपरिवारसँग पनि बस्न पाएका छैनन् ।
टाढै बसेर खानुपर्ने र टाढै सुत्नुपर्ने अवस्था छ ।
