नेकपा माओवादी केन्द्रले देशभर सहमतिको आधारमा स्थानीय तहको निर्वाचनका लागि पार्टीको तर्फबाट उम्मेदवार तय गर्यो । तर, नुवाकोटको ककनी गाउँपालिकामा भने फरक दृश्य देखियो । सो पालिकामा पार्टीले आन्तरिक प्रतिस्पर्धा (चुनावी प्रक्रिया) बाट उम्मेदवारको टुंगो लगाएको थियो ।
आकाङ्क्षी धेरै भएपछि वैशाख पहिलो साता ककनी गाउँपालिका कमिटीले आन्तरिक चुनावमार्फत अध्यक्षको उम्मेदवार छानेको हो । जसमा गाउँपालिका कमिटीका अध्यक्ष सुमन तामाङ ३४ मतका साथ विजयी हुँदै उम्मेदवार चयन भएका थिए । यस्तै मानबहादुर लामाले १८ मत ल्याएका थिए भने अर्का दाबेदार शक्ति लामाले जम्मा १ मत ल्याएका थिए ।
