अन्ततः शेरबहादुर देउवा नेतृत्वको पाँच दलीय गठबन्धनको सरकारले पपुलिष्ट बजेट नै ल्याउने भएको छ । आर्थिक वर्ष २०७९/८० को बजेटको अन्तिम तयारीमा जुटेको सरकारले कर्मचारी तलब सुविधा वृद्धि गर्नेदेखि सामाजिक सुरक्षाभत्ता ‘वृद्धभत्ता’को उमेर हद समेत हेरफेर गर्ने तयारी गरेको हो । 

अर्थ मन्त्रालय स्रोतका अनुसार सरकारले आगामी आर्थिक वर्षको बजेटमार्फत् वृद्धभत्ताको उमेर हद ७० वर्षबाट ६५ वर्षमा झार्ने तयारी गरेको छ । यस्तो तयारी प्रधानमन्त्री शेरबहादुर देउवाकै चाहना र निर्देशनमा संशोधन गर्न लागिएको अर्थ मन्त्रालय सोतको दाबी छ । 

‘बजेटले वृद्धभत्ताको उमेर हद ६५ वर्ष बनाउनुपर्छ । सोही नीतिबमोजिम बजेट बनाउनुस्,’ प्रधानमन्त्रीबाट निर्देशन भएको छ । प्रधानमन्त्रीबाटै यस्तो निर्देशन भएपछि अर्थमन्त्रीले पनि यसलाई बजेटमा समावेश गर्ने भन्नुभएको छ,’ स्रोतले रातोपाटीसँग भन्यो ।