मात्र यति फरक छ तिमी र मबीचको
तिमी जन्मिदा तिम्रो घरमा खुसियाली
छाएको थियो रमिता मनाएका थिए
म जन्मिँदा मेरी आमा अस्पतालमा
ठाउँ नपाएर सुत्केरीमै देह उडेको
शरीर जलेको थियो
यति फरक छ तिमी र मबीचको
तिमीलाई सबैले चिरञ्जीवी भएस् भनेर
आशीर्वाद खुसीले दिइरहेका थिए
त्यतिबेलै म अबोधलाई सबैले आमा टोकुवाको
उपमा दिँदै थिए।
यति फरक छ तिमी र मबीचको
तिम्रो नाम चिना पात्र हेरेर पण्डितले राखेका थिए
मलाई दुनियाँले अनेकौं अशिस्ट नामले पुकार्थे
यति फरक छ तिमी र म बीचको
तिमी महलमा बसेर संसार हेर्थ्यौ
मेरो सडकको बास भयो
अनि पापी पेट शान्त पार्नका
लागि फोहोरका डङ्गुर चाहार्छु।
खातेको उपमा प्राप्त गर्दै।
यति फरक छ तिमी र मबीचको
तिम्रा लागि पढ्न उत्कृष्ट ए लेभलका स्कुल छन्
मेरो लागि पढ्न संसारभरि
संयोगको लागि फोटो पठाइन्छ निशुल्क पढाइन याचना गरिन्छ
यति फरक छ तिमी र मबीचको
तिमी संसार घुम्छौ सोखमा
म हजार गाउँ डुल्छु जीवनयापनमा
यति फरक छ तिमी र मबीचको
तिमी मर्दा आँसु बगाउने धेरै छन् जलाउने
आफ्ना छन् पशुपति आर्यघाट छ
म मर्दा लावारिस हुन्छु
हामी एकै मानव हुँ र पनि
यति धेरै फरक किन, यति धेरै विभेद किन
यति धेरै अन्याय किन मेरो प्रश्न छ
हे भगवान एक चोटी हामीलाई
समान गराइदिन सक्दैनौ?
साच्चै तिमी भगवान हौ सबैबाट पुजिन्छौ
म एउटा सबैबाट तिरस्कृत मान्छे हुँ त्यसैले त तिमीले पनि सुन्दैनौ
हो भगवान यति फरक छ तिमी र ममा पनि