पीडाका पहाडले थिचिएको दुर्गम बस्तीभित्रका अबोध नागरिक। लालसाविहीन मुहारभित्र लोलाएका नजर। दश वर्ष चलेको आन्तरिक द्वन्द्वले रोल्पा-रुकुमका दुर्गम गाउँ आज पनि पुरानै अवस्थामा छन्। निस्वार्थीहरूको बस्तीमा नजर नपुगेका कारण परिवर्तनले गोरेटो कोरेको छैन।
गाउँमा युवाको अभाव छ। घरछेउको रोजगार डोजरले खोस्दै जाँदा अधिकांश पुरुषहरू रोजगारीका निम्ति मनाङ-मुस्ताङ, कालापार वा उपत्यका तिरका ईट्टाभट्टा तिर लागे पछि गाउँमा महिलाहरूको बाहुल्यता छ। प्रतिफल बिनाको कडा परिश्रमले महिलाहरूमा प्रजनन् स्वास्थ्य समस्या बढ्दो छ। पाठेघर खस्ने रोगबाट पीडित आमाहरू पनि कडा श्रम गर्न बाध्य छन्।
