मन्त्रालय बाँडफाँटलगायतका विषयमा छलफल गर्न सत्तासाझेदार दलहरुको बैठक बसिरहेकाे छ।
प्रधानमन्त्री निवास बालुवाटारमा केही बेरअघि सुरु भएको बैठकमा सत्तासाझेदार दलका शीर्ष नेताहरु सहभागी छन्। बैठकमा मन्त्रिपरिषद् विस्तारमा सहमति जुटाउने प्रयास गरिने जनाइएको छ।
बैठकमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा र उपसभापति पूर्णबहादुर खड्का, नेकपा (एकीकृत समाजवादी) का अध्यक्ष माधवकुमार नेपाल सहभागी छन्।
त्यसैगरी नेपाल समाजवादी पार्टीका अध्यक्ष डा बाबुराम भट्टराई, लोकतान्त्रिक समाजवादी पार्टीका अध्यक्ष महन्थ ठाकुर, जनमत पार्टीका अध्यक्ष सिके राउत, नागरिक उन्मुक्ति पार्टीका अध्यक्ष रञ्जिता श्रेष्ठ, राष्ट्रिय जनमोर्चाका अध्यक्ष चित्रबहादुर केसी, आमजनता पार्टीका अध्यक्ष प्रभु साहलगायतका नेता सहभागी छन्।
सत्ता गठबन्धन आबद्ध दलहरु सहमतिमा पुग्न नसक्दा हाल सरकार विस्तारमा ढिलाइ भइरहेको छ।
