बजार अनुगमनका क्रममा सरकारी टोली माथि असहयोग तथा अभद्र व्यवहार गर्ने व्यवसायीहरूलाई प्रशासनले कार्वाही गर्ने चेतावनी दिएको छ।

आइतबार कालीमाटी र कुलेश्वरमा वाणिज्य, आपूर्ति तथा उपभोक्ता संरक्षण विभागले गरेको बजार अनुगमनका क्रममा व्यवसायीहरूले असहयोग गरेका थिए। 

उद्योग, वाणिज्य तथा आपूर्तिमन्त्री दामोदर भण्डारीसमेत संलग्न भएको उक्त अनुगमनमा मन्त्री भण्डारी फर्केपछि केही व्यवसायीले कर्मचारीमाथि अभद्र व्यवहार गरेका थिए। 

सोमबार व्यवसायीसहित कालिमाटी फलफुल तथा तरकारी विकास समिति, काठमाडौँ जिल्ला प्रशासन, प्रहरी तथा वाणिज्य विभाग लगायतका नियमनकारी निकायले अनुगमनमा असहयोग गर्नेमाथि कारवाही गर्ने निर्णय गरेका हुन्।

व्यवसायीहरूले अहिले मात्रै नभइ विगतमा समेत असहयोग र अभद्र व्यवहार गर्दै आएको प्रमुख जिल्ला अधिकारी जयनारायण आचार्यले बताए। व्यवसायीले अनुगमन प्रभावित गर्ने कृयाकलाप गरेमा उनीहरूको व्यवसाय दर्ता खारेजी गरिने प्रजिअ आचार्यले बताए।

सोमबार नियमनकारी निकायले गरेका निर्णयहरूमा अनिवार्य रुपले मूल्य सूची राख्नुपर्नेे, अनुगमनमा अनिवार्य रुपले सहयोग गर्नुपर्ने, अनुगमनमा असहयोग गरेका व्यवसायीलाई नियम वमोजिम कारवाही गर्ने, सम्पूर्ण व्यवसायीले कारोबारको बिलबीजक अनिवार्य रुपले राख्नुपर्ने, विकास समितिको परिसर भित्रको सरसफाईमा विशेष ध्यान दिनेलगायत रहेका छन्।

आइतबार मन्त्री भण्डारीले गरेको छड्के अनुगमनका क्रममा माछा पसल र तरकारी पसलमा सरसफाइ नगरेको भेटिएको थियो भने अस्वभावीक मुल्यबृद्धि गरेको पाइएको थियो।