माओवादी जनयुद्धको उर्बरभूमि रोल्पा–रुकुमको पर्यटन प्रवद्र्धन गर्न एक्सप्लोर गरिएको ‘गुरिल्ला पदमार्ग’को प्रवद्र्धनमा अहोरात्र खटिँदै आएका यात्रा लेखक सुरेन्द्र राना पर्यटनकर्मी माझ ‘गुरिल्ला’ उपनामले चिनिन्छन् । यिनै गुरिल्लाले रुकुम (पूर्व)को भूमे गाउँपालिकाको चिनारी गराउने फोटो बुक ‘भूमे दि पिक्टोरियल जर्नी’ पाठक माझ ल्याएका छन् ।
भूमे क्षेत्रमा बरोबर घुमेर त्यहाँका सुन्दर तस्बिर र आबश्यक जानकारी बटुलेर उनले पुस्तकमा ढालेका हुन् । यसका लागि उनले पछिल्लो चार वर्ष मेहेनत गरेका छन् । भूमे गाउँपालिकाले प्रकाशन गरेको १२८ पेजको रंगीन पुस्तकमा भूमेको प्रकृति, संस्कृति, जीवनशैली, इतिहास र गुरिल्ला पदमार्गको जानकारी छ ।
चेन्जिङ नेपालको सम्योजनमा प्रकासित पुस्तकमा लेखिएका सूचना अंग्रेजी र नेपाली दुबै भाषामा भएकाले स्वदेशी तथा विदेशीका लागि बुझ्न सजिलो हुन्छ । गाउँपालिकाको नेतृत्व सम्हालेका हिजोका माओवादी कमाण्डर रामसुर बुढा मगर भूमेलाई पर्यटन गन्तव्यका रुपमा विकास गर्न लागि परेका छन् । ‘यो पुस्तक हाम्रो गाउँपालिका चियाउने कलात्मक आँखीझ्याल हो’, गाउँपालिकाका प्रमुख बुढा मगर भन्छन्, ‘हामीले गाउँको प्रचार गर्न पुस्तकसँगै बृत्तचित्र पनि बनाएका छौं ।’
भूमेमा पर्यटनको प्रचुर संभावना छ । खासमा नेपाल सरकारले साबिकका गाविसहरू काँक्री, महत, चुनबाङ, मोरावाङ, काँडा र रुकुमकोट गाविसको वडा नं ४ लाई समेटेर भूमे गाउँपालिका बनाएको हो ।
अतुलनिय प्राकृतिक एवं सांस्कृतिक सम्पदाले भरिपूर्ण गाउँपालिकामा माओवादी जनयुद्धसँग सम्बन्धित थुप्रै सम्पदा छन् । त्यसले यसलाई जनयुद्ध अध्ययन केन्द्रका रुपमा विकास गर्न सकिन्छ । गाउँपालिकाले यस्ता सम्पदा सरक्षण गरेर पर्यटकीय प्राेडक्ट बनाउने काम गरिरहेकाे गाउँपालिकाका प्रमुख प्रशासकीय अधिकृत चन्द्रसिह श्रेष्ठ बताउँछन्।
याे पनि पढ्नुहाेस।
भूमेमा माओवादी छापामारको तालिमस्थल, शहिद पार्क, शहिद मार्ग, छापामारले बनाएका पुल, जनबादी पुस्तकालय, जनयुद्ध स्मारक, चुनबाङ बैठकस्थल, भेरीडाँडा जनयुद्ध संग्रहालय, शहीद धनमाया पार्क लगायत सम्पदा छन् ।
गुरिल्लाको यस पुस्तकले पर्यटन विकासमा टेवा पुग्छ । अँग्रेजी र नेपाली दुबै भाषामा कलम चलाउँदै आएका गुरिल्ला वर्तमान समयका स्थापित ट्राभल राइटर हुन् ।
मुलुकभित्र घुमेर विभिन्न डिजिटल र प्रिन्ट मिडियामा पर्यटन सम्बन्धी फिचर तथा समाचार लेख्दै आएका उनबाट आगामी दिनमा पनि यस्तै पुस्तकहरूको आशा गर्न सकिन्छ ।