कप्तान विराट कोहलीकाे शानदार प्रर्दशन
कप्तान विराट कोहलीकाे शानदार प्रर्दशनमा वेष्ट इण्डिजविरुद्धको तीन खेलको एकदिवसीय क्रिकेट सिरिज भारतले जितेको छ।
आइतबार अन्तिम तथा तेस्रो एकदिवसीयमा वेष्ट इण्डिजलाई ४ विकेटले पराजित गर्दै भारतले सिरिज २–१ ले जितेको हो।
वेष्ट इण्डिजले दिएको ३ सय १६ रनको फराकिलो लक्ष्य भारतले ४८ ओभर ४ बलमा ६ विकेट गुमाएर पुरा गर्यो।
भारतको जितमा कप्तान विराट कोहलीले सर्वाधिक ८५ रनको योगदान दिए। विराटले ८१ बलमा ९ चौका प्रहार गरेका थिए।ओपनर रोहित शर्माले ६३ बलमा ८ चौका र १ छक्का सहित ६३ रन जोडे। त्यस्तै अर्का ओपनर लोकेश राहुलले ७७ रनको उत्कृष्ट इनिङ खेले। लोकेशले ८९ बलमा ८ चौका र १ छक्का प्रहार गरे।
रोहित र लोकेशले २१.२ ओभरमा १ सय २२ रनको साझेदारी गर्दै राम्रो सुरुवात दिएका थिए। श्रेयस ऐर र ऋषभ पन्त समान ७ रनमा आउट भए। रविन्द्र जडेजा ३९ रनमा अविजित रहे। शार्दुल ठाकुर १७ रन जोड्दै जित पक्का गरे।
वेस्ट इन्डिजका लागि किमो पलले ९.४ ओभरमा ५९ रन खर्चेर ३ विकेट लिए। अज्जारी जोसेप, जेसन होल्डर र शेल्डन कट्रेलले १–१ विकेट लिए।
यसअघि कटकस्थित बरबती स्टेडियममा टस हारेर ब्याटिङ थालेको वेस्टइन्डिजले निर्धारित ५० ओभरमा ५ विकेट गुमाउँदै ३ सय १५ रन जोडेको थियो।
वेष्ट इण्डिजका लागि निकोलस पुरनले ८९ रनको अर्धशतकीय इनिङ्स खेल्दा कप्तान केइरन पोलार्डले अविजित ७४ रन बनाए। पुरनले ६४ बलमा ८९ रनको आक्रामक इनिङ खेले। उनले १० चौका र ३ छक्का प्रहार गरेका थिए। कप्तान पोलार्डले ५१ बलमा नटआउट ७४ रन जोड्ने क्रममा ३ चौका ७ छक्का प्रहार गरे।
यस्तै ओपनर एभिन लेविसले २१, शाइ होपले ४२ रन,रोस्टन चेजले ३७ रनकाे याेगदान दिए।
यता जेसन होल्डर ७ रनमा नटआउट रहे।
भारतका लागि सैनीले २ विकेट लिँदा शार्दुल ठाकुर, मोहमद शामी र रविन्द्र जडेजाले १-१ विकेट हात पारे।
पहिलो खेलमा वेस्ट इन्डिजले भारतलाई ८ विकेटले हराएको थियो। दोस्रो खेलमा भने भारत १ सय ७ रनले विजयी भएको छ। भारतले तीन टि ट्वान्टी सिरिज पनि २-१ ले जितेको थियो।
