आईसीसी विश्वकप लिग-२ त्रिकोणात्मक सिरिजको पहिलो खेलमा ओमानले दिएको १९८ रनको लक्ष्य पछ्याएको घरेलु टोली नेपालले कमजोर सुरूवात गरेको छ।
ओपनर पारस खड्का र ज्ञानेन्द्र दुबै सस्तैमा आउट भए। कप्तान ज्ञानेन्द्र मल्ललाई चौथो ओभरको पाँचौ बलमा ओमानका कालीमुल्लाहाले १ रनमा आउट गराए। उनले १२ बलको सामान गरेका थिए।
लगत्तै अर्को ओभरको तेस्रो बलमा पूर्वकप्तान पारस खड्का ३ रनको व्यक्तिगत स्कोरमा आउट भए।
खड्काले १४ बलको सामना गरेका थिए। उनलाई ओमानका बिलाल खानले आउट बनाएका हुन्।
यसअघि टस हारेर पहिले ब्याटिङ गरेको ओमानले निर्धारित ५० ओभरमा ९ विकेट गुमाउँदै १९७ रन बनाएको थियो।
उसका लागि मोहम्मद नदीमले सर्वाधिक ६९ रनको अविजित उत्कृष्ट अर्ध शतकीय इनिङ खेले। उनले ९६ बलमा ५ चौका र २ छक्का प्रहार गर्दै टिमलाई सम्मानजनक स्कोरमा पुर्याए।
४० ओभरमा ६ विकेट गुमाउँदै १२१ रन बनाएको ओमानले अन्तिम १० ओभरमा ७६ रन जोड्यो।
नसिम खुशीले तल्लोक्रममा १८ बलमा २ चौका र २ छक्का सहित महत्वपूर्ण २८ रन जोडेका थिए।
खुसी र नदमीले आठौं विकेटका लागि आक्रामक ४२ रनको साझेदारी गरेका थिए। करणले केसीले शरद भेषवाकरबाट खुशीलाई क्याच गराउँदै साझेदारी तोडेका थिए।
करणले पहिलो ओभरको अन्तिम बलमा ओपनर जतिन्दर सिंहलाई ४ रनमा बोल्ड आउट गर्दै उत्कृष्ट सुरूवात दिलाएका थिए।
करणले नै सातौं ओभरको चौथो बलमा खावर अलीलाई विनोद भण्डारीबाट ५ रनमा क्याच आउट गराउँदै व्यक्तिगत दोस्रो विकेट लिए।
१३ औं ओभरको तेस्रो बलमा दीपेन्द्र सिंह ऐरीले अकीबलाई १६ रनमा डाइरेक्ट हिटमार्फत रन आउट गराएका थिए।
१९ औं ओभरको चौथो बलमा स्पिनर सुशन भारीले कप्तान जीशान मकसुदलाई २० रनमा एलबीडब्यू आउट गराउँदै एकदिवसीयमा डेब्यू विकेट लिए।
सोही ओभरको एक बलपछि सुशनले विकेटकिपर सुरज कुमारलाई कप्तान ज्ञानेन्द्र मल्लबाट शून्यमा क्याच गराएँदै एकै ओभरमा दुई विकेट लिन सफल भए।
एक समय ओमान ५७/५ को संकट अवस्थामा पुगेको थियो । खराव सुरुवात गरेको ओमानलाई छैठौं विकेटका लागि सन्दीप गौड र मोहम्मद नदीमले ६० रनको साझेदारी गर्दै केही उकास्ने काम गरे।
सुशनलेनै गौडलाई विकेटकिपर विनोद भण्डारीबाट ३३ रनमा स्टम्पिङ आउट गराउँदै यी दुईबीचको साझेदारी तोडे। ७२ बल खेलेका गौडले ३ चौका र १ छक्का प्रहार गरे।
दीपेन्द्र सिंह ऐरीले ४२ औं ओभरको चौथो बलमा बादल सिंहलाई रोहित कुमार पौडेलबाट ५ रनमा क्याच आउट गराए।
त्यसपछि करणले कामिदुल्लाहलाई १ रनमा आउट गर्दै आफ्नो चौथो विकेट पुरा गरे।
तीब्र गतिका बलर करणले ९ ओभरमा १ मेडन राख्दै ४७ रन खर्चेर ४ विकेट लिएका हुन्।
ओडीआईमा डेब्यू गरिरहेका स्पिनर सुशन भारीले १० ओभरमा १ मेडन राख्दै १४ रन मात्रै खर्चिएर ३ विकेट हात पारे। दीपेन्द्रको नाममा १ विकेट रह्यो। यस्तै ओडीआई डेब्यू खेल खेलेका अभिनाश बोहराले ९ ओभरमा २ मेडनसहित ३८ रन खर्चिए पनि विकेट लिन सकेनन्। यस्तै विकेटका लागि भरपर्दा बलर सन्दीप लामिछाने आज महंगो साबित भए। १० ओभरमा १ मेडनसहित ४५ रन खर्चिएका सन्दीपले कुनै पनि विकेट लिन सकेनन्। उनले ५ चौका र १ छक्का दिएका थिए।
यस्तै पारस खड्काले ७ ओभर बलिङ गर्दै १ मेडनसहित ३० रन खर्चिए।
