उपाधि जित्ने लक्ष्यका साथ थाइल्याण्डकाे बैंकक पुगेकाे नेपाली क्रिकेट टाेलीकाे पाेल खुलेकाे छ। शनिबारदेखि सुरु भएकाे एसीसी इस्टर्न रिजन टि–२० क्रिकेट प्रतियोगितामा मलेसियाले दिएकाे १ सय ५५ रनकाे लक्ष्य पछ्याउन नसक्दा नेपाल २२ रनले पराजित भयाे।  

बैंककस्थित ट्रेडथाई मैदानमा भएकाे खेलमा मलेसियाले पहिलाे ब्याटिङ गर्दै १ सय ५४ रन बनाएको थियाे। प्रत्युत्तरमा नेपालले निर्धारित २० ओभरमध्ये २ बल खेल्न बाँकी रहँदा सबै विकेट गुमाएर १ सय ३२ रन मात्र जाेड्याे। नेपालका लागि कप्तान ज्ञानेन्द्र मल्ल र उपकप्तान दीपेन्द्रसिंह ऐरीले समान ३८–३८ रन बनाए पनि त्याे पर्याप्त भएन। पूर्वकप्तान पारस खड्का पनि ९ रनमा आउट भए। अन्य ब्याट्सम्यानमा पवन सर्राफले १९ रन बनाए। विनाेद भण्डारी ७, कुशल मल्ल ०, आरिफ सेख ५, करण केसी २ रन बनाएर आउट भए। 

सन्दीप लामिछानेले टि–२० मा सय विकेटकाे काेशेढुंगा (२ वर्षमा सन्दीपको सय विकेटको कोशेढुंगा) पुरा गरे पनि नेपाल पराजित भयाे। उनले पनि १ रन मात्र बनाए।  

यसअघि मलेसियाले सइज अजिज साइद मुबारककाे सर्वाधिक ५१ रनकाे सहयाेगले ६ विकेटकाे नाेक्सानीमा १ सय ५३ रन बनाएको थियाे। यस्तै अमिनुदिन राम्लेले २९ तथा मोहम्मद अनवर अरुदिनले ३१ रन जोडे। नेपालका लागि सन्दीपले ३ तथा अविनाश बोहराले २ विकेट लिए। करण केसीकाे नाममा १ विकेट रह्याे।