स्वाभिमानी देशको स्वावलम्बीय कदमहरुमा
उट्पटाङ्गका कुरा तेर्स्याएर
जनमानसमा व्यर्थका अफवाह फैलाउने
हो म देश को गद्धार हुँ।
भल बाड़ी हावा हुरी भूकम्प
अनेकौ प्राकृतिक प्रकोपहरू
जीउने अनेक रहर भएर पनि
अकाल मृत्यु भएका ती निर्दोष
बेवारिस लाशहरू
हाहाकार र चित्कारले गुञ्जायमान आकाश
यसबेला प्राप्त हुने सरकारी राहत
अनेक बहानाले सुटुक्क गरि
आफ्नै भण्डार भरेर
जन मानसमा अन्योलता भरेर
आफू नुनको सोझो हुन खोज्ने
हो म देश को गद्धार हुँ।
सीमानामा हरदम खटी रहने
देखीरहन्छु म सिपाहीहरु
मेरै एक रात को मीठा सपना दिलाउनेहरु
मेरै निम्ति छातिमा गोली खाएर
शहीद बन्दछन्
अनि म उनै वीर सिपाहीका परिवारमा
अधिकारका कुरा गर्दै
उनीहरुकै अधिकार हनन गर्न खोज्ने
हो म देश को गद्धार हुँ।
मेरा देशका कतिपय गुप्ती कुराहरू
गोप्य योजना र महत्वपूर्ण कदमहरु
म मेरो सानो झोपड़ी भित्र
अंतरजाल*का तानावना मिलाउँदै
सामाजिक सञ्जाल माध्यम बनाउँदै
देश विदेशभरि साझा गरि
म मेरै देश को अस्तित्वसँग खेलवाड गर्दै
म बदनाम गर्न लागी परेको
हो म देश को गद्धार हुँ।
पहाड़ पाखा र कन्दरादेखी बग्दै बग्दै
हिमालहरुको हार बनेर
सजिएका सुन्दर यी खोला नाला झरना र नदीहरु
यी वन्य सम्पदाहरु
म रम्न सकिन यी सुन्दरताहरुमा
यसैले त नित्य म बाँध हालेर
यी निर्मल चञ्चल जल परिधिलाई
सँधै धमिल्याउन चाहने
हो म देश को गद्धार हुँ।
मेरा बाबाले देखाउनुभएका
पसीनाका मूल्यहरु अनि
आमाले सिकाउनु भएका
संस्कारका विषयवस्तु पर पन्साएर
भौतिक सुख सम्पदामा रम्न हिंड़दै
पश्चिमी सभ्यता अप्नाएर
मेरा पौराणिक मान्यतालाई
उपहास गर्ने म
हो म देश को गद्धार हुँ।
आऊ मलाई समाऊ
ए सभ्य मानव
म मेरा गलतीहरु स्वीकार्न चाहान्छु
देऊ दंड मलाई देशद्रोहको
देऊ फाँसी मलाई
किनकी
म देश को गद्धार हुँ।
