किसान स्केच- एक
जब गाउँमा अनिकाल पस्छ
ठिक त्यो बेला कि त दिल्लीले खान्छ
कि त चेन्नईले खान्छ
गाउँको रणमायाहरुको अर्ग्यानिक सपना।
किन खान्छ?
सत्ता मौन छ।
किसान स्केच- दुई
आमाले जीवनको दुइ एपिसोड
यै खेत खनेर बिताइन्
जहाँ अहिले निर्माण भएको छ
सयदिने रोजगारको आधा कल्चो बाटो।
किसान स्केच- तीन
कृषक सन्चबीर लिम्बूको
कोदो बारीको भित्तामा झुन्ड्याएको छ
'एजुकेसन फर्र अल'
लेखिएको सर्वशिक्षा अभियानको बोर्ड
त्यही बोर्डको फेदमा बसेर
सोधी बस्छ सन्चबीर लिम्बू-
अक्षर भनेको कस्तो हुन्छ?
स्कूल भनेको कस्तो हुन्छ?
किसान स्केच- चार
जब-जब यो देशको शिक्षा आयोगहरूले
सर्वशिक्षा अभियानको घोषणा गर्छ
तब-तब नै किन अशिक्षित हुन्छ हँ
गाउँको असंख्य सन्चबीर लिम्बूहरु?
किसान स्केच- पाँच
अदुवा कुहेर फ्रस्टेषण भएको
किसानहरुको चेतनालाई ब्ल्याकमेल गर्छ
साला यो कुच्चोको भाउ,
जब सुकाउरोमा परेर मर्छ अलैंची
दिलमाया दिदीहरुको बैशालु सपनाले
सुसाइड गर्छ अलैंचीको बोट-बोटमा झुन्डिएर।
किसान स्केच-छ
फल्दै-फल्दैन कोदो
दश रुप्पे के.जि छ कुच्चोको भाउ
अभावले जहिल्यै समाति बस्छ
किसानहरुको स्कूल जाने छोरा-छोरीको खुट्टा
यो कण्डोमको एड देखाउँने राष्ट्रिय टि भी च्यानलले
किन देखाउँदैन हँ अलैंचीको विज्ञापन?
१ .
२ .
३ .
४ .
५ .
